Ua sauni nei se tamā mai i Matautu Falealili e ave le ofisa o leoleo i le faamasinoga ona o le taofia o lona atalii i le potu taofia o le ofisa o leoleo i Apia i le faaiuga o le vaiaso na tea nei.
O le faafitauli o lenei mataupu o le tamā ia Siaosi Tiavaasue ua faalua ona taofia e leoleo i le lesitalaina o le taavale na fealuai ai, ae ua taofia e leoleo faatasi ma le atalii lea e na o le tolu tausaga le matua.
Sa faapea mai lenei tamā e lē teena le mafuaaga o le taofia o ia ona e sa‘o leoleo o lea na agai e toe faafoi le taavale i le tamaloa e ana lea sa, ona o lea ua alu atu le faatonuga a leoleo e ave le taavale e lesitala, peitai na toe maua e leoleo e lei oo lava i Vaitele i le faletaavale lea e ana le taavale.
O le toe taofiga lona lua na sau ai loa le faatonuga a leoleo i le ofisa Tutotonu i Apia, e leai lava se isi laasaga o le loka o ia, ae o lea e tutū ai lava ma lona atalii na o i laua na agai ane i Apia ae o le tina o le aiga o loo nofo mai i Matautu Falealili ma le isi vaega o le fanau ma le pepe ma e faigata ona toe malaga mai i Falealili e avatu lona atalii ae taofia Siaosi.
E itula na taofia ai i laua i le tasi o potu taofia ae na ta‘ua e Siaosi na fai atu lava le leoleo sinia na tau atu i ai le faatonuga lenei e taofia i laua pe lē o iai se tasi e avea le tamaitiiti i le fale ae o lana tali na o laua na omai e mamao Falealili.
O lea la na taofia ai lava lenei tamaitiiti faatasi ma lona tamā ma na tapue e Siaosi ata o lona atalii a o tagi, taumafai e alu i le fale lē ta‘ua ae e leai se nofoaga i totonu o le potu taofia, o le vevela, manogi leaga o lea nofoaga o vaega uma ia na faamauina e lenei tamā ma faamatala i tusitala ona o le faanoanoa i le leai o se isi feutagaiga e mafai ona fai ae tatala i laua i tua.
O le tea o le itula talu ona taofia le tamā lea ma lona atalii ae alu atu loa i luga i potu taofia se isi leoleo e “taai lua” Corporal, ma vaai atu i le tamaititi lea e taofia ma lona tamā, tatala loa i tua ma otegia i latou e vaaia le potu taofia i le taofia o lenei tamaitiiti laitiiti ae lē fai i ai se isi tuutuuga.
Na avane i le vaega o taavale afi, fai le lipoti, agai ane le alii sinia lea na fai muamua le faatonuga e taofia Siaosi e suafa ia “Keti” ma fai loa le isi faatonuga e tietie Siaosi, o lona atalii ma le leoleo i Mulinuu e faasaini mai le Lesitala o le Faamasinoga ma faamautu ai le tatala o Siaosi i tua. O nei faiga uma ua momoli e lenei alii i le tamaitai loia ia Leuluaialii Olinda Woodroffe lea ua ofo fua mai lona taimi e ave ai se tagi faasaga i Leoleo i lenei foi faiga ua tulai mai ma ua tālia nei le isi fesootaiga a lenei tamā ma le tamaitai loia.
“O a‘u ia na ala ona ou fia faalauiloa le mataupu lenei leaga e lē tatau ona tupu i se isi tamaitiiti i le lumanai”, saunoa ai Siaosi.
