Na faamalolo lē tumau le afioga Samoa Mulinuu Mulinuu ose tasi o Komesina lagolago ma se tasi o taitai leoleo susuga Luatimu Samau ina ua suia le Minisita o Leoleo lea ua toe tauave ele afioga ile Palemia susuga Tuilaepa Sailele Malielegaoi.
Na faamalolo ai foi ma le leoleo taailua le susuga Hillary Eteuati. Sa manatu le toatele ole faamalolo oi latou e fesootai ma le gaioiga na loka ai le Komesina o Leoleo ma faia iai nisi moliaga lea e silia ile 200 ae ua toe ave i tua ma soloia ele faamasinoga. Peitai o lea ua faailoa ise faaiuga ale Kapeneta ua taulimaina ele Samoa Times e lē o ole mafuaaga lea.
Ole faaiuga ale Kapeneta ua faaalia ai ole a faia se Komisi Suesue e suesue ai ni amioga ua tuua‘ia ai le soli ei latou nei o aiaiga o tulafono o galuega tau leoleo ile faatinoga oo latou tiute. Ole Komesina lagolago le afioga Samoa Mulinuu ma le taitai leoleo o Luatimu Samau, ole a suesueina e lea komisi e toatolu ona sui, ona o tuua‘iga e faapea sa taumafai e faalavelave i molimau a leoleo sa lagolago ai moliaga tau taavaleafi ole Faatonu ole ofisa o moliaga solitulafono, le susuga Mauga Precious Chang. Ole a suesueina foi le Komesina lagolago ile tauaveina ose mataupu a Sililoto. O Luatimu o tuua‘iga foi ole faalavelave ile mataupu o molimau ole faamasinoga o moliaga ole Faatonu ole Ofisa o Moliaga Faasolitulafono, ma suesue nisi mataupu e ono faatulai mai i luma ole Komisi e manatu le Komisi e talafeagai.
Ole alii leoleo taailua o Hillary Eteuati oloo tuua‘ia ini soligatulafono e lē o faailoaina ile faaiuga ale Kapeneta ae ole a folasia pe a faagasolo galuega ale Komisi Suesue, ole a seei ai ni sui se toatolu.
Oi latou ia e aofia ai le faletua le afioga Tavaui Annie Laumea sa avea ma taitai leoleo asiasi a‘o galue ile Matagaluega o Leoleo ile tele o tausaga. Ole susuga ile Faifeau o Viliamu Mafoe, ma le susuga Sami Leota ose tasi oloo faagaioia se pisinisi inisiua i Samoa ae sa filifilia foi ini tausaga e lei mamao atu ole taitai poo le Manager ole pulega ole aulakapi ale atunuu ole Manu Samoa.
Ole susuga Luatimu sa faia le suesuega o tuua‘iga faasaga ile Komesina o Leoleo i luga ole fautuaga mai lē sa avea ma Minisita o Leoleo. Ole taitai leoleo asiasi foi lea na faia moliaga ile mae‘a o lana suesuega.
O Samoa Mulinuu na tauaveina tiute faa-Sui Komesina ile aso na toe foi atu ai le Komesina e faaauau ona tiute ae loka ma taofia ai i moliaga ua soloia ma togi i fafo ele faamasinoga i luga ole talosaga ale Loia na aumai ele Loia Sili mai Niu Sila, e lei lelei ona faia le suesuega ma e fesiligia le tutoatasi ole suesuega ona o aafiaga o leoleo sa lotolotoi ile faia ole suesuega faasaga ile Komesina.
Ole leoleo taailua o Hillary na ia faaulu se tagi faasaga ile Komesina o leoleo e mafua mai ise tasi o osofaiga tau laau faasāina na alu i Faleatiu, lea na tuua‘ia ai e Hillary le Komesina o Fuiavailili Egon Keil i lona faatonuina o ia e fana se tasi o tagata na taofia mo suesuega mai lea osofaiga poo se raid.
O leoleo e toalua na faatinoina le faatonuga e tuuina atu le Komesina e taofia sa aumai ise faaiuga ale Kapeneta ile tausaga ua mavae e faamalolo lē tumau foi, peitai oloo faigaluega lava ia alii leoleo ile taimi nei.
Na faaalia ese tasi oi laua ua faaauau pea ona faigaluega ona e lē iloa poo le ā le mafuaaga ole aofia oi laua ile faaiuga ale Kapeneta e faamalolo lē tumau. Ole taimi e faia ai galuega ale Komisi Suesue ua filifilia ona sui, e lē o iloa ae e iai le talitonuga ole a faailoa mai ele Kapeneta ise taimi e lē o toe mamao.
