Ua sauni le Palemia ma le faigamalo e folasia i luma ole Palemene ile isi ana tauaofiaga o sosoo ai nei le mafuaaga ole solitu ale Faamasinoga o Fanua ma Suafa.
Ua faailoa ile lipoti ale Komiti suesue ale Palemene ua taoto nei ile laulau a fono ale Palemene, sa oo le avea‘i ile faamasinoga ina ia oo atu faamasino mo ni a latou molimau peitai ole tusi atu ale Faamasino Sili e leai se faamasino e oo atu ile komiti suesue ale Palemene.
Mo le silafia ele aufaitau e maioio ma manino lelei le tutoatasi ole Palemene, ma le tutoatasi ole faamasinoga ma e lē feaiāa‘i itutino tāua nei ole Malo.
Ole teena ele Faamasino Sili ole finagalo ole komiti ale palemene ole faamautuina lea ole tutoatasi ole faamasinoga.
Peitai oloo faaalia ile lipoti ale Komiti e iai lo latou malosiaga faaletulafono e samania ai soo se tagata i luma ose suesuega ae sa lē faaaogāina lea malosi faaletulafono ona sa fetuutuunai le finagalo ole komiti ma maua ai le faaiuga e taatia ai loa faapea.
E anoanoai mataupu ua laga ile lipoti ale komiti suesue ale Palemene ina ua mae‘a le latou galuega ma tuuina atu le latou lipoti tusitusia ile Fono Aoao Faitulafono. O le mafuaaga lea ole faia ole finagalo ole Palemene e tuuina atu le lipoti e tali mai iai le Faamasinoga o Fanua ma Suafa.
E ui ina teena ele faamasinoga le taimi ole suesuega ae oloo ave pea iai le avanoa. Ole fesili pe faamata ole a talia ele Faamasinoga o Fanua ma Suafa le isi lea avanoa.
Ole lipoti ale Komiti oloo faaalia ai sa teena foi ele tamalii sa avea ma Peresetene ole faamasinoga le afioga Tagaloa Tuala Sale Tagaloa Kerslake le faatalauula na ave iai ise tusi mo le oo atu i luma o le komiti. Pe ana oo atu e pei ona faaalia ele komiti ile lipoti, semanu ole a maua ai ni tali i faaseā ma tuua‘iga na folasia e nisi ole atunuu na faia a latou molimau ile taimi ole suesuega. Ile lipoti lava lea oloo faaalia ai ele komiti
ua tatau ona silasila le Palemene ile siitia ole tulaga o faamasino ole Faamasinoga o Fanua ma Suafa, e lē gata o totogi ae ole tomai ma le silafia e filifilia ai ni faamasino.
Oloo fautuaina ua tatau ona iai ni tomai ma faailoga ole tulafono e umia ese tasi e filifilia.
Ua fautuaina foi e tatau ona iloilo le tofi faamasino ile tuanai ose vaitaimi galue e pei foi ona faia i isi tofiga o galuega ale Malo.
E manino mai i lea fautuaga ale Komiti ua tatau ona silasila le Palemene pe ua talafeagai ona faakonekarate loa le galuega tau faamasino ole Faamasinoga o Fanua ma Suafa. Peitai afai e talia lea tulaga e manino mai ai foi ole tulaga lea e tatau ona faia i tofi faamasino ole Faamasinoga Maualuga ale atunuu.
