Na faafofoga le mamalu o Samoa i Sini i le saunoaga a le Afioga Namulauulu Alama Ieremia i luga o le leitio FM89.3 Samoa Sportstar i le sauni atu nei e tauaveina ma saili manuia mo le tapenaga o le sefululima a le Manu Samoa aemaise le tofia o ia e suitulaga ia Tuala Matthew Vaea lea na umia le Faauluuluga o le High Performance Unit a le Iuni Lakapi a Samoa.
I isi suiga ua iai nei e aofia ai le avea o Faleomavaega Vincent Fepuleai e suitulaga ia Fred Amoa sa avea ma Pule Sili o le Iuni lakapi lea na faamavae i le vaiaso ua tuanai. O Tamaleta Falanai Taimang Jensen ua tofia nei e avea ma teutupe ma o nei tofiga e talitali ai le isi fono faletausaga e aloaia ma faamautu ai loa.
I le saunoaga a Namulauulu, e talitonu e mataina ma e ono iai le avanoa e toilalo ai le Olopeleki i le Manu Samoa ia Iulai.
“O le Manu Samoa afai e atoatoa uma tapenaga i vaega uma o se tasi o ‘au matautia i le taaloga e pei ona vaaia i nisi tausaga”.
Na ia faafetaia ai foi le Iuni i le filifilia o ia. “E talosia ia maua foi se avanoa e tuu mai e le Iuni e faasoa ai le tele o se silafia ma agavaa o loo ia umia ae lē na o le HPU,” o se saunoaga lea a Ieremia. O i latou uma nei Fepuleai, Jensen ma Ieremia na taaalo uma mo le Manu Samoa.
O Alama Ieremia na auai i le toafitu muamua a Samoa lea na siamupini i le Canberra 7s 1992 sosoo ai ma Hong Kong 1993 ma sikoa i le sailiga siamupini ma le ‘au malosi a Fiti lea na sosoo le tolu tausaga o suipi i Hong Kong, le taamilosaga aupito maoae o le lakapi i le lalolagi.
