O tala fatu na mau tulaga ile tauvaga tusigatala ale nusipepa ole Samoa Observer ole tausaga ua mavae ua tuufaatasia uma ise tusi ma lomia ile gagana peretania, o lea ua faaliliu ile gagana Saina ma ua salalau atu ai ia tala o Samoa ma le Pasefika i tuluiga ole atunuu tele o Saina. Na saunoa le amapasa o lea atunuu e faamautu i Samoa ma ia faamatala le faigata ole la galuega ma lona toalua ile faaliliuina ole tusi atoa.
Ole itu faigata ole saili o upu tonu ole gagana a Saina e fetaui uiga ma upu o tala ile gagana peretania.
Ole mafuaaga ole faia ele amapasa ma lona faletua o lea galuega ona o lona fia faasoa atu i tagata o lona atunuu o tala na tusia e tagata Samoa ma nisi ole Pasefika sa mau tulaga ile tauvaga tusigatala.
Ole isi autu taua e pei ona faaalia ele amapasa ole mafai ai lea e tagata o lona atunuu ona malamalama i tala e faatatau ia Samoa aua o lona talitonuga e taua tele le malamalama o tagata o Saina i uiga ma aga o tagata Polenisia.
Ole mitamitaga lea ole Faatonu sinia ole nusipepa ole Samoa Observer le afioga Gatoaitele Savea Sano Malifa ona ose laasaga taua ua oo iai le faamoemoe o lana pisinisi faasalalau ona ua faaliliu tala na tusia e nisi ole atunuu ma le pasefika ile gagana a Saina. O lona talitonuga ose feau taua lea ole a faitau iai tagata o lea atunuu ma maua ai lo latou malamalamaaga i lenei itu ole lalolagi.
Ole molimau foi lea ale amapasa o Saina o Wang ona ole toatele o tagata o lona atunuu e itiiti poo le leai foi ose silafia ia Samoa ma le pasefika ao lea ole a fesoasoani tala pupuu ua i totonu o lea tusi e momoli atu ai se feau mo i latou.
Ole saunoaga ale alii amapasa na ia toe faamanatu mai ai le silia ile selau tausaga ole mafutaga a Samoa ma tagata Saina ona o lea ua iai tagata Samoa ua iai le toto Saina ma ose isi lea itu taua ia te ia o lona faaliliuina ole tusi mai le gagana peletania ile gagana a lona atunuu.
