E lei mafaufauina ele afioga ile alii faamasino o Vaepule Vaemoa Vaai, ole a fai ni finauga tau ile tulafono ole faavae ole atunuu i ona luma ina ua tulai mole taimi muamua le tamaitai faatonu ole ofisa o moliaga tau solitulafono le afioga Mauga Precious Chang.
“Ua faateia a‘u ile taeao nei ile tulaga ua tulai mai ma e sili ai ona suesueina muamua ele faamasinoga maualuga le finauga”. Ole folasaga lea ale faamasino ma ia faatonuina ai le itu a leoleo male ofisa o moliaga tau solitulafono e tapena mae‘a moliaga faasaga ile tamaitai faatonu ona toe valaau ai lea i ona luma ile Aso Faraile ole vaiaso nei 23 o Setema 2016.
Peitai e faalagolago le faaauau o taualumaga o moliaga tau taavaleafi o Mauga Precious Chang ise faaiuga ale faamasinoga maualuga ile finauga pe iai se paoa ole Loia Sili ale Malo nate filifilia ai se isi loia e ese mai loia ale ofisa o moliaga tau solitulafono e finauina moliaga e lua ole tamaitai faatonu.
Ole tamaitai loia o Brenda Heather Latu sa auai i taualumaga ale faamasinoga faaitumalo ina ua valaau moliaga ole faatonu. O lana folasaga i luma ole faamasinoga o ia ua tuuina atu iai malosiaga ole faatonu e nate tauaveina ai le finauga o moliaga.
Peitai sa tulai le alii loia mai Niu Sila na filifilia ele Loia Sili le susuga Satiu Simativa Perese ma ia faailoa ile faamasinoga o ia ua iai malosiaga e finauina moliaga. I fafo ole potu faamasino ina ua tolopo le mataupu na faaalia e Satiu i tusitala, o ia oloo finau ile faatonuga mai le Loia Sili ale Malo le afioga Lemalu Hermann Retzlaff. “Oute ioe e lē tatau ona toe finauina ele ofisa o moliaga solitulafono ni moliaga ose tasi mai lena ofisa ona e fesiligia ai le faimeatonu”, o lana saunoaga lea.
Na tapa se finagalo ole tamaitai loia o Brenda Heather Latu, ae sa lulu mai lona ao e lē mafai ona saunoa ise iota e tasi ole finauga ona oloo taatia ile faamasinoga e faia iai sana suesuega ma se faaiuga.
Faaalia ele alii faamasino o Vaepule afai e mae‘a le Aso Gafua e leai se faaiuga ua faia ele faamasinoga maualuga ile finauga ole a faaaogā loa le faautautaga tatau poo le common sense ole faamasinoga poo le a tonu le mea ole a fai.
E lei tuuina atu se tali a Mauga Precious Chang i moliaga ole avetaavale faatamala ua manu‘a ai se tagata, male moliaga ole avetaavale matautia.
Ole alii loia le afioga Aumua Ming Leung Wai oloo tulai mole tamaitai faatonu ole ofisa o moliaga tau solitulafono.
