“O lou naunautaiga lava e faaaogā suauu popo Samoa ma suauu mai le fua ole fetau a Samoa e gaosi ai oloa faamanogi tino ma oloa e teuteu ai faamomosi le tino”
Ole tina o Lufilufi Rasmussen ma lona toalua o pule faatonu ia ole la pisinisi ua faaigoaina ole Misiluki Skin Care ua salalau atu i isi atunuu e pei o Niu Sila oloa ua gaosia mai le suauu popo ma suauu ole fua ole laau ole fetau, mo le faamomosiina ole tino faapea oloa tau fagu manogi.
Ose tasi lea o atinae tau pisinisi ua lauiloa ai ile lalolagi le suauu popo ma le suauu ole fetau mai Samoa oloo gaosi ele faalapotopotoga o Tina ma Tamaitai Faipisinisi a Samoa poo le Samoa Women in Business.
O lea ua amata nei ona faatalanoa ele Misiluki Skin Care a Samoa fefaatauaiga ma nisi o pisinisi ma kamupani i totonu o Iapani ina ua manuia taumafaiga ale Misiluki ile faaaliga tele ale aufaioloa sa faia i Iapani ile vaiaso ua mavae.
“Oute manao lava e siitia lenei atinae auā a sologa lelei ma manuia ole a lelei tele lea mo galuega a tagata i Samoa aemaise i latou oloo taumafai e gaosi le suauu popo ma le suauu mai le fetau”.
Na faaalia lea finagalo ole tina o Lufilufi a‘o faagasolo le faaaliga o oloa i Iapani lea sa auai ai le aufaioloa, e luaafe limaselau ae silia ile tol afe tagata faipisinisi na auai.
Faaalia ise pepa o faasalalauga mai le Faalapotopotoga o Tina ma Tamaitai Faipisinisi a Samoa, ose tasi lea o taumafaiga ua lotolotoi ai tina faipisinisi ole atunuu ina ia saga siitia pea ise tulaga maualuga ma lelei galuega alofilima a tina o Samoa i taumafaiga faapisinisi.
“Ole naunautaiga ole ofisa ole Malo o Samoa i totonu o Iapani, ia tele ni kamupani ma pisinisi mai lo tatou atunuu e auai i faaaliga tetele faapenei auā ose faitotoa vatele lea mo oloa gaosi a Samoa e faalauiloa ai”.
Ole finagalo lea ole tamaitai Amepasa o Samoa i totonu o Iapani le afioga Faalavaau Perina Sila-Tualaulelei ina ua ia molimauina le taumafaiga ale tina ia Lufilufi ma le kamupani ole Misiluki Skin Care mai Samoa.
Faaalia foi ele tamaitai Amepasa oloo tulimatai pea ele ofisa ole Malo o Samoa i lea atunuu ia faateleina pea avanoa faapea e auai atu ai pisinisi eseese oloo gaosia oloa i Samoa e faalauiloa ai a latou taumafaiga.
Ole tāua ole faaaliga i lea atunuu mo le Misiluki Skin Care ole faamautu ai o sootaga mo le fausia o konekarate ma isi kamupani e fia maua ni oloa a lea pisinisi i Samoa, ma ua faailoa ele tina o Lufilufi Rasmussen, e toatele le aufaipisinisi ua faailoa atu lo latou talia o ana oloa aemaise ole fiafia ile tuupepaina poo le packaging.
