“Ia Tumau i le Pogai” o le sini autu lea ua faaautuina iai polokalame a le sinoti o le ekalesia Meotisi i Saute e pei ona faagasolo nei i le lima vaiaso i totonu o aulotu.
Talu ai o le tetele o faafitauli ua tulai mai i lenei vaitau o le talutalu fou mo tupulaga, ua a’e ai se lagona o le afioga i le alii Sea o le sinoti ia Rev Oianatai Matale faapea le fofoga o le sinoti ia Rev Fuifui Leaana, e tatau ona galulue faatasi le pule o le autalavou le susuga ia Rev Laupepa Agafili ma tupulaga i totonu o polokalame faatino a le Sinoti.
E pei ona masani ai galuega faaleautalavou sa galue lava na’o le pule autalavou e faatino ona tiute tauave i totonu o le Sinoti ae i le taimi nei ua filifilia ai sui o autalavou mai aulotu taitasi e galulue faatasi ma le pule autalavou e faatinoina le galuega tala’i ma le galuega faasoo a Keriso i totonu o ekalesia.
O le agaga maualuga i le finagalo o le Susuga i le Sea ma le fofoga o le Sinoti, ia toe faatepa fanau talavou i le pogai, e ala lea i le ola usiusitai, ava ma faaaloalo i totonu o aiga, o le va i fafo ma tagata matutua.
O le uiga moni lea o le autu ia tumau i le pogai, auā o fanau uma e tutupu a’e lava ua iai lo latou faasinomaga ma lo latou tupuaga.
O le polokalame muamua lenei ua fai ai se suiga i le faaaogāina o tupulaga talavou e galulue faatasi ma le ta’ita’i autalavou. Ua tāua foi lenei taumafaiga e anau mai ai talavou e faaaogāina le soifua galue e auauna ai i le Atua ma lona finagalo, ma taofia ai foi i latou i le tosina gofie atu i faafiafiaga o le lalolagi ma oo ai i faafitauli o le olaga.
O le aulotu i Hamilton ma Te Kuiti na amata mai ai polokalame, ona sosoo lea ma Magele ma Papatoetoe, o Papakura ma Middlemore, o Manukau ma Manurewa ae faaiu ai i aulotu i Otara, Botany ma Flat Bush.
O polokalame uma e agai lava i pesega faaleagaga e fatuina lava e le autalavou, o siva faitaga ma faaevagelia.
I le polokalame i le taeao o le Aso Sa i aulotu e tolu na faaiu iai polokalame a le Sinoti na maualuga ai faafiafiaga a nai fanau Aoga Aso Sa i le faatinoina o faaevagelia, auā o le tasi lea itutino ua silasila mamao iai le Sea ma le Fofoga o le Sinoti faapea le pule autalavou, ia faaaogāina fanau laiti i le taimi nei, e tapena atu ai lo latou lumanai pe a oo ina oo atu i latou i totonu o polokalame faaleautalavou.
Ae le gata i lea ia toe saga faaolaola pea autalavou ma Aoga Aso Sa i totonu o ekalesia taitasi. Ua iai le faamoemoe o le pule autalavou a mae’a le polokame lenei a le autalavou mo lenei tausaga ona tapena ai loa lea o le usugafono.
O ekalesia taitasi o loo filifilia mai ai sui talavou o loo mafai ona galulue i totonu o le aufaipese ua faaaogāina nei mo galuegafai a le ekalesia e pei o asiasiga i e o gasegase e alu iai pesepesega ma faigalotu.
