E tele nisi e talitonu i le logomālie o molimau a tagata e saafi ai i le tele o mea lelei ma uiga lelei o nai aiga ua motusia mafutaga i le maliu ma le oti, ae maimau e, pe ana toe lagona mai ae pagā lea ua leai lava.
O le naunautaiga o le faletua ia Tehilla Lemana Wright i le afiafi o le Aso Faraile na faamanatu ai lona Iupeli auro poo lona 50 tausaga, na ia ta‘ua ma fofola mai i lumamea lona manaoga ina ia pueina se video e fai ma molimau.
Na faamanatu lona limasefulu tausaga i le ekalesia Worship Centre a Lawnton lea sa taitaia e le susuga i le aao tusitusi i Kuiniselani, le susuga ia Ps Moala Siliva Moala.
E toatele le auvalaaulia na auai ae ese foi le matagofie o lea aso soifua i lona faatinoina. O le itu na faafiafiaina ai le faletua ona ua mafai ona ia faafofoga i molimau a tagata e uiga ia te ia auā se ā le aogā e toe teu ai nei molimau tāua se‘i faia i toe taimi o le tagata ae na te lē o lagonaina mai pe a mavae ma aiga i lenei olaga.
Fai mai lana saunoaga poo le ā le finagalo o le Atua, ae ua iai le pine faamau i lona soifua o lana video ua pueina, ua lagona lona faagaeetia i nei molimau ua mafai ona ia lagonaina. Sa fai ma fofoga o le aso le tofa ia Gaseata Tovi‘o Lemana faapea le susuga ia Ps Sitika Lemana Satui o le uso o le tamaitai fai aso fanau.
O tuaa o le faletua ia Tehilla, o le tofa ia Logo ma le tausi ia Sina Lemana. Na lologo le faafofogaaga a le aofia i le solo umi ma le logo mālie sa lauina e si ona alii, le susuga ia Apineru Wright e faatatau i le soifua ma galuega lelei a si ona faletua i le latou mafutaga.
Na foi le aofia ma le mama ua lomi ma le vaa ua goto ona o faaaloaloga mo lana auauna faapea ma le faletua faapea lana auauna sa auai. Manaia faafiafiaga ae o le itu e sili ona tāua na iu mea uma i le alofa ma le agalelei mai o le Atua.
Manuia tele lou iupeli auro Tehilla Lemana Wright!
