Ua fai si leva o pepese punonou le Ekalesia Metotisi a Puipaa i nota tuai e ala lea i le tau togitogiina o le latou aitalafu lea sa fausia ai le maota o le galuega ma le hall auā galuega faatino o le matagaluega. O lea aitalafu e silia ma le $200,000.00 lona aofai. Ae o le agaga fiafia ma le faafetai i le susuga i le tausi matagaluega ia Tava‘e Auvele ma le faletua ia Susana Auvele ma le Ekalesia Metotisi mai Puipaa ua iai nisi ua vave ona latou suiina le fati o le pese ua pepese fiafia ai.
O le aumalaga e 32 mai Samoa a le Ekalesia Metotisi a Puipaa sa latou uia ala o le mativa i Niu Sila nei ona o le fia maua lea o se fesoasoani. Sa tapena mai lenei faamoemoe i le tausaga ua mavae ma o lea sa maua ai loa le avanoa i le masina o Aperila e malaga mai ai e faataunuu lea manaoga.
O le aso 23 o Aperila na amata ai le sailiga tupe a le Metotisi a Puipaa i Ueligitone ma sa maua ai le latou tino i tupe e $70,000.00, ma toe taliu mai loa i Aukilani ma tapena ai le isi latou faafiafiaga lea sa faataunuuina i le Aso Toonai ua mavae, aso 30 o Aperila i le hall a le Ekalesia Metotisi a Papatoetoe. O se feiloaiga fiafia na auai tamafanau a le afioaga o Puipaa faapea uo ma ē masani o paolo ma gafa sa auai uma e apogi lenei faamoemoe. Ae sa lē tuua ai le taupati atu o susuga i faafeagaiga o faasinoti e lua a le Ekalesia Metotisi i Aukilanai i le fia togi foi o se maa auā le taupati mai o le matagaluega mai Samoa. Ae lē gata i lea o le sao o le Ekalesia Metotisi Samoa i Niu Sila o loo peresetene ai le susuga i le faafeagaiga ia Rev Tovia Aumua sa lagolagoina lenei polokalame.
O le Sea o le faasinoti a Aukilani a Matu ia Rev Oianatai Matale sa taitaiina le faamoemoe i le sauniga lotu ona faagasolo loa lea o ipu a aulotu o faasinoti taitasi.
O le susuga ia Leao Alaelua Fetu sa fai ma fofoga o le aso ae o le peresetaene o le mafutaga a Puipaa i Aukilani le susuga ia Lavea Time sa fai ma sui o le mafutaga i Aukilani ma le aumalaga mai Samoa e tu tootoo e momoli le agaga faafetai i le paia o le auvalaaulia ma Samoa potopoto sa auai e tusa ai ma le loto foai ma le silasila i le Atua ma lana galuega ua tini ai ma taunuu le faamoemoe, faatasi ai ma meaalofa na tatala ai le malo auā le paia o le aufaigaluega totofi a le Atua sa auai.
E $99,700.00 le maau ma le lima foai a le atunuu o loo i Aukilani sa taulimaina e le susuga i le faafeagaiga ia Rev Tava‘e Auvele ma le Ekalesia Metotisi mai Puipaa, e ese mai ai i faamanuiaga sa maua mai i Ueligitone, ma ua iai le lagona maualuga o le Pereretene ma le mafutaga i Aukilani, ua kilia le aitalafu a le matagaluega o loo iai i Samoa.
Ma ua amata ona toe taliu nisi o le aumalaga i Samoa ma le tala fiafia a o nisi o loo nonofo e faamae‘a le ta‘i masina o o latou visa e pei ona malaga mai ai.
