O galuega faaloia i Samoa ma lona faagaioia o le a faatonutonu e se tulafono ua pasia e le Palemene i lana tauaofiaga i le vaiaso ua mavae lea ua tolopo i le masina o Tesema 2014. O se tulafono o loo aiaia ai le faatinoga o tiute tauave o loia i le nonofo faafeagai ai ma le atunuu o loo manaomia lea auaunaga aemaise o pisinisi ma kamupani eseese.
O le itu i pili totogi a loia o le isi lea vaega tāua o le tulafono ona ua aiaia ai le totogi faatapulaa. O atugaluga ia sa faaleo e nisi o faipule o le Palemene ona o pili a loia i le maualuluga ma ua lē gafatia e nisi.
Na faaalia e le faipule o le Itu agai le tofa Lealailepule Rimoni Aiafi, o taimi o le palota e faia ai ni tagi e ave i le faamasinoga o taimi sili ia ona faigata i le maoa‘e ai o le totogi o loia, ae ua ia faafetaia le tulafono o lea ua aiaia ai totogi fua pau.
Faaalia e le tasi o faipule o le Itu agai le susuga Papalii Li‘o Taeu Masipa‘u o se loia, e iai le maliega tusitusia e sainia e se loia ma se tagata o le a ave se tagi o le palota ma o se maliega ua tau fai malilie ai i le totogi. Na atugalu se tasi o faipule o le Malo le afioga Peseta Vaifou Tevaga i le faia o totogi e nisi o loia i luga o teugatupe poo accounts e aunoa ma le faailoa i le tagata e ana le teugatupe o le aofaiga.
O se isi foi atugaluga o le faatonu mai e le faletupe o se tagata e alu e vaai le loia a le faletupe ae o le totogi e fai si taugata, ma e lē talia foi e le faaletupe le loia e filifilia e se tagata ma o se faiga e lē talia ai se nonogatupe.
E lagolagoina e le faipule o le Vaimauga i Sisifo le tofa Lefau Harry Schuster o se loia foi lea atugaluga. Na ia faailoa i le Palemene o se tulaga lē manuia lea i aiaiga a faletupe ae o le aiā tatau a le tagata e saili ai lana loia e nafa ma le faia o pepa o sana nonogatupe.
O faaseā e faasaga i ni pili ua maoa‘e a loia o loo aiaia ile tulafono le tuuina atu i le sosaiete a loia e suesue ai. Peitai e lē o noatia ai se tasi e ana se faaseā e saili ai se isi auaunaga e toe ave i ai lana mataupu pe a lē faamalieina i se faaiuga a le sosaiete a loia.
O se avanoa ua aiaia e maua ai e le atunuu le avanoa e sailiili ai pea mo se faaiuga o lana faaseā pe a lē faamalieina. Faaalia e le Palemia le susuga Tuilaepa L Sailele Malielegaoi, o se taimi muamua foi i lalo o lea tulafono o le a mafai ai ona sueina e suetusi faamaumauga ma faamatalaga tau tupe a ofisa loia e faasino i ni teugatupe a tagata o loo tausia faamavaega e loia.
O atunuu i fafo e pei ona saunoa le Palemia i le Palemene, e ta‘i faafā ona sue ia tusi ae o Samoa o lea ua talosaga le sosaiete a loia e amata i le sueina taitasi i le tausaga. O le folasaga a le Palemia na ia faailoa ai foi ua tele loia ua tapunia o latou ofisa ma aveesea o latou tiute faaloia ona ua mageso lima ma tago loa faaaogā faalētatau tupe a tagata o loo ia vaaia.
