E leai ma se tagata ta palolo ole 300 na faamauina ile faitau ale tusitala na ‘ula sana faasolo manogi, pe laei foi se ie solosolo fou, e pei ona sa masani ai talaaga o taaga palolo i luma atu ole 30 tausaga talu ai, e lē gata o Upolu ae faapena foi ile motu tele i Savaii.
E ta ane le 12 ile vaveao ua leva ona valiano taavale, ma malolo tagata tapalolo e faatali le taimi e oso ai le palolo, peitai e ta ane le 3 ua tau faaofiofi paka o taavale. Ua lauiloa le gataifale o Lefaga aemaise ole mataaaga le Return to Paradise, lea na lolofi atu iai tautai i po sosoo e lua ole vaiaso talu ai. Ole po ole Aso Faraile na o masalosalo ai le toatele, ma le po ole Aso Toonai na sosoo ai, na alu tuli iai le silia ile 500 tagata.
Ina ua mautinoa lava ole po tonu lava lea e ta ai palolo. E ta ane le 5 ile vaveao ua leva ona faasusū se vaega ile asiga ole taimi e faapoapoa ai le aloalo i fuamoa e miliona ma miliona ua tosina iai o tatou tagata.
E ‘afa ane le lima ua amata ona mapuna a‘e i luga. O i latou na iai moli uila sa sisiva fiafia ma tufi taufao le gai‘o ole matai‘ai. Ae o tagata e leai ni moli uila sa na ole salu lava faasauea ole upega tapalolo, a lavea ane lava ise manuia ua laki foi.
Ua lē o toe vaaia ni sulu aulama ma sulu taume. Sosoo mai ai ma moli penisini e fau se vaalaau ma faaopeopea ae faatautau ane ai le moli penisini e oo atu ile 20 futu le mamao o lana susulu.
Ose tulaga mataina i tautai ole po, ona ole toatele na faaaogā ola ma ato fue umu, nonoa iai le ie valavala e tali ai palolo ae faasisina ese le vai ne‘i mea ane e liu suavai, pe a to‘alia ise lepavai.
Ole isi foi tulaga mataina ole faaaogāina o atigi paelo e faatau ai povi masina, poo ni paelo ga‘o ua faaaogā e sui ai le ola ma le ato fu’e umu.
Ole isi tina na fuli lava ia e asu ana palolo ile atigi paelo, ae faapea ia ole a ‘afa lana paelo i palolo, ae leai ole ‘afa o lana taaga ua uma ona liu suavai ile vai lepa i totonu ole paelo.
Na maitauina foi le eseese o taimi e sola pe mou mālie ese ai lava le palolo, ua liu suavai, ae lei malamalama lelei. Faatusa ile tele o nuu i Savaii oloo ta ai palolo, e malamalama ane lava o tufi taufao pe a oo ina mafiafia aemaise o vaega ole aloalo e masani ona to‘alia iai.
O afioaga ile itu o Tane e iai Safotu, Samauga ma Sasina e malamalama lava o ta palolo. Ole tulaga ese lea na maitauina foi i Lefaga ina ua malama ane ua leai ni tagata ina ua vave liu suavaia palolo.
Ile masina lava lenei o Oketopa, ole mau masani lava faapea ole masina mo Upolu, peitai sa tetele i Savaii. Ae ole masina o Novema e faapea ole masina o Savaii, ae e tetele ai i Upolu, faapei ona maitauina ile po ole Aso Toonai i Lefaga, na matuā iloga ona tetele ma mafiafia le sau ale palolo.
O aiga e toatele tagata ma lelei moli sa faaaogā, e silia ile 10 ofu ale tagata malosi na maua. O tagata na ta i vaa na maitauina foi le manuia tele o latou taaga.
I tala mai Savaii ile Itu o Tane, e lei malolosi ni taaga i gatai o Samauga ma Safotu. Ole tala foi lea mai Salelavalu, peitai e iai le faamoemoe e toe masalosalo foi ile po ole Aso Sa lea e faitau iai le toatele.
Ae o Upolu lava ia, i tagata na ta i Lefaga ile Return to Paradise Beach, ailoga e toe taina ona ole tetele ma le malosi ole palolo na maua. Faatusa ile Itu o Tane ma Faasaleleaga lea na faapea mai molimau, na vaivai le palolo e lē taumate le tetele ile po ole Aso Sa.
I Amerika Samoa toeititi lava o gataifale ole tele o nuu ole motu o Tutuila e ta ai le palolo. Peitai e iai foi lona eseesega i taimi ole po e asi ai. I Tutuila, e oso loa le masina amata ona mou atu le palolo, faatusa i Samoa nei, e maualuga lava le masina o asu.
O sami i autafa ole malaevaalele i Tafuna le vaega o Tutuila, e matautia le mafiafia ai ole palolo pe a oo ina manuia taaga, e ui ina faasā, ae sa maua lava avanoa o aiga e tolotolo ai i totonu ole pa ma latou ulo ma taufui paelo.
O na mea uma e tutumu uma lava i palolo ma faatalitali le van a sikulaki e taamilo ane ma fue iai le taaga ua manuia. Ole tausaga na tapalolo ai le tusitala ile malaevaalele, na ave ma le van a sikulaki le paelo atoa e tumu lelei, e totogi ai le taavale. O aiga laiti i na aso i Tutuila, tusa ma le 30 tausaga talu ai, e oo mai lava le isi palolo o auauai palolo ole isi tausaga.
O moliga palolo, ua ose tasi lea o agaifanua a Samoa e feasiasia‘i ai aiga, ma fai ma leleiga i nisi o aiga. E malaga mai le tagata mai tuā poo Savaii ma se gapia Palolo i aiga i Upolu, ae mulimuli ane, e tatau foi ona mafaufau le aiga ua taunuu iai le gapia palolo, mo se oso lelei ole tautai na malaga mai.
Ile tele o tausaga ua tuanai e oo mai nei lava ua faatau palolo, ile maketi mai le $10tala ile $30tala ile ofuofu, tusa ma le afapauna le mamafa.
Peitai ole taimi foi lea e manuia ai le tele o faifeau i afioaga, auā ole faamuamua lava e ave iai e tautai ma le aiga potopotoga, tusa lava pe laiti palolo maua, e tatau lava ona faamuamua le tufa ile faifeau, pei ona sau ai, ma tausia e augatupulaga o aso nei.
Ole masina fou o Novema e toe ta ai le palolo, ma ua saunia foi le toatele mo lea taimi i Upolu nei, auā e masani ai ona tetele ai Upolu e ui ina o le taimi lea mo Savaii.
