O siamu ua gaosia e le alii Falani i Samoa, ma manuia ai le au fai faatoaga ile atu Falealili

O siamu ua gaosia e le alii Falani i Samoa, ma manuia ai le au fai faatoaga ile atu Falealili

E lē na’o Poutasi ole itumalo o Falealili ma ona tagata ua manuia ile alii palagi talavou lea o Cedric Holtz. Ole tulisi mai Falani na sau e tafao mo le lua vaiaso, ae mulimuli ane ua maofa ile loto alolofa o tagata Samoa ma toe foi mai ai ile tausaga e 2014.

Ma amata mai ai lava ona ia gaosia le siamu mo na’o ia lava. Ae ua faasolo ina iai tagata e manana’o ile tofo lelei o ana lana siamu, ma faasolo atu lava ina tele le siamu e kuka pe a manaomia.

Ole manaomia tele ai lava ole siamu, lea ua fanau mai ai nei le fagaosi siamu i Poutasi Falealili. Ua la’u atu iai uta popo, o fualaau eseese pei o vi, fa’i, tipolo, ulu, esi ma isi.

Talanoa Cedric, e iai taimi e nate lē o mana’omia ni fualaau, ae faatau lava ona ole alofa i tamaiti aoga, e o atu ma esi. E te’i lava ua tu atu lea tamaititi aoga ma se esi, e faatau atu, ma faatau lava ona ole alofa atu iai.

Ua faasolo ina iai le sao ole siamu Ma’oi ile faalauiloaina o Samoa, ae o tupe aumai ile atunuu e ala ile faatau atu o siamu Ma’oi nei mai Falealili i atunuu i fafo.

Ile toe tepa ai i tua a le alii palagi Farani, ile faiga o ana meaai faanatura sa taumafai e gaosi faalaititi, ae uma ane ua tele lava tagata e mananao ai.

Na amata i fagu pa’u recycle, ae ua oo lava ina oka fagu mata’eta’e lea ua faaaogāina nei, ma faasolo atu lava ina ia a’oa’o atu i tagata le gaosiga ole siamu.

Taimi nei, ua mafai ona gaosia siamu e oo atu le tele ile 40-200tane ile falegaosi oloa ua faatuina nei i Poutasi Falealili.

Ole tulaga maoae ole siamu, Ma’oi, a le Food Pacific, talu mai le 2015 na amata ai ona faatau atu mo ni tupe maua. Ua avatu i faleoloa ile taulaga ma faletalimalo ae o faleoloa mo mealofa.

Na fai foi le sao ole Ma’oi ile faaaliga oloa taumafa i Sini Ausetalia, ile masina o Setema ole 2017, ma tosina mai ai pisinisi mai Niusila ma Europa.

Ole masina fou o Mati, e avatu ai le oka sili ona tele,  talu ona amata ai le pisinisi lenei. Ole oka tele lea e ave i Iapani, e 1,500 fagu. O fagu lea ua faaaogaina nei e faatau ai le Ma’oi, na oka faapitoa mai lava i Saina, mai tama’i fagu i fagu feololo, e aogā i meaalofa, o tafaoga, ma le aiga atoa.

Talanoa foi Cedric o iai le manaoga ole Food Pacific, e toe faafou le avea ai ose totino ole Asosi o fale gaosi oloa i Samoa, SAME.

Ausia  le Food Pacfic lana sini

Ole faanaunauga ole pulega ole Food Pacific, ole maua ai lea o avanoa faigaluega mo tagata. E le gata ole faigaluega ile falegaosi oloa, ae o avanoa ile aufaifaatoaga fualaau e sapalaia le gaosiga ole siamu.

E iai lava taimi e o ane ai isi ma amoga, i taimi e le’o mana’omia, ae faatau lava ona ole manatu alofa i tagata, pei ona talanoa Cedric. O faamanuiaga uma nei mo atinae ile nuu o Poutasi, e aofia ai ma le Poutasi Development Trust, lea e taulamua ai le afioga a Tuatagaloa Joe Annandale.

Ile taimi ole afā o Gita na tele lava fualaau ua faaleagaina ai, pei ole vi, esi, fa’i, ulu ma tipolo. O fagu siamu, o loo gaosia mai fualaau e lima e maua gofie ile atunuu, pei ole esi, fa’i, ulu, popo, vi ma le tipolo Iapani, maua uma i Falealili.

Pau le lui mo le taimi nei, ole taumafai o tagata e faatau atu fualaau, ae lē o iai se manaomia ilena taimi, ae iu lava ina faatau ona ole alofa i tamaiti e o atu ma latou. Oloa e aofia ai ma popo, ta’i $20tala ile 100 popo ma sua. Faigofie ona valu popo ina ua iai matatuai e lua, e alu ile uila.

Soo se siamu lava e alu lava iai le pepee poo le penu popo ma le tipolo. Taimi nei, ua le toe palagi tafao Cedric, ae ua avea  ma aumea mamae a Poutasi, i faamanuiaga mai le tomai o lea alii, ua uu tupe ai FalealilI.