E ui ina ua le taunuu le fusuaga a Laauli Joseph Parker ma le alii Peretania o Hughie Fury, peitai, e le o muta ai lona faamoemoe, e taunuu lava ona fusu ile aso 6 o Me. Ise feiloaiga ma le autusitala na ta‘ua ai e Parker, lona manao e fia fusu lava ile aso 6 o Me. “Ua leva ona ou tapena mo le Aso 6 o Me, ma ua ou sauni oute fusu, poo ai lava le paga ole a maua e sui tulaga ia Fury, ua ou sauni oute fusu.” ole finagalo faaalia lea o Laauli Joseph Parker.
E tusia lenei lipoti e lei mautinoa mai, poo ai ole a fusu ma Parker ile Aso 6 o Me. E le faigofie ona sailia se paga a Parker, aua e le soona aumaia se tagata tau ina faataunuu ai le fusuaga. E tatau ona filifili mai se tagata ua iloga ile lalolagi, ose tagata e mafai ona vevela se la fetauiga ma Parker, ose tagata foi oloo i totonu o tama fusu e 15 pito i luga ale WBO.
E toatasi le tama fusu ua maea ona togi mai lana lui ia Parker, ole alii fusu mai Amerika ia Dominic Breazeale. O Breazeale oloo tulaga 6 ile faatulagaina o tama fusu ole paga mamafa ale WBO.
O lana fusuaga mulimuli nei, na fetaui ai ma le alii o Izu Ugonoh ma manumalo ai ile tu‘i oti ile taamilosaga e 5. Sa matamata ai Laauli ile fusuaga lea. Ole alii o Izu oloo koleni faatasi ma Parker, ose uo mamae a Parker, ole tele lava o fusuaga a Parker i Niu Sila nei, e fusu ai foi ma Izu. Na ta‘ua e Breazeale i luga ole Tweed, lona manao e fusu ma Parker, na ia ta‘ua foi, ose avanoa mo Parker e taui ai le faia‘ina a lana uo o Izu.
O Iuni 2016, na fusu ai Breazeale ma Anthony Joshua i Peretania ma faiaina ai ina taofia le fusuaga ile taamilosaga e fitu, ina ua le mafai e Breazeale ona faaauau le fusuaga. E pau lea ole faiaina a Breazeale mai ana fusuaga e 19, e 18 manumalo, ae 16 fusuaga na manumalo ai ile tu‘i oti.
Ole isi tama fusu oloo tilotilo iai le pulega, ole alii Romania e suafa ia Razvan Conjanu, ole alii lenei oloo faatulaga ele WBO ile numera 14, ua 18 ana fusuaga faapolofesa, 16 manumalo ae lua faia‘ina.
O Cojanu sa fesoasoani i tapenaga a Joseph Parker, ole isi lea tamafusu sa sipāina Parker i taimi o ana toleniga i Las Vegas, talu ai oloo faatulaga ile numera 14, o lona uiga e mafai ona fusu Cojanu ile fusi oloo umia nei e Parker e tusa ai o aiaiga ale WBO
Manu‘a Hughie Fury i toleniga
E ui ina faatoese mai le pulega a Fury ia Parker ma le Duco Events ina ua toe faamaamulu Fury mai le fusuaga ae toe lua vaiaso faataunuu, peitai, e le o taoto lelei lava i lagona ole pulega a Parker le tulaga ua tulai mai.
E pei ona faaalia e Segialii David Higgins, lona lē talitonu ile mafuaaga ua faailoa mai e faapea ua afaina le gaugatua o Fury i toleniga, ma ua faatonuina e fomai e tatau ona malolo mo le fa vaiaso.
E mai lava ile amataga, e le faigofie fesootaiga ma le Pulega a Fury. “Oni tagata e faigata tele ona talanoa iai” ole tala lea a David Higgins.
E le gata i lea, ae sa faapea foi ona finau malosi lava le pulega a Fury e toso atu le fusuaga e faia i Peretania, ona e le mananao e omai i Niu Sila.
E pei ona lipotia ile lomiga ale Samoa Times, e 5 miliona tala na taumafai le pulega a Fury e sailia e togitupe ai le fusuaga ina ia faataunuuina i Peretania.
Na muamua lava faailoa mai uiga le fiafia ole pulega a Fury, e ala lea ile faitioina o tapenaga ale Duco Events mo le latou malaga mai.
Na le fiafia le pulega i o latou nofoa ole vaalele na totogi ele Duco Events, mulimuli ane toe sui ele Duco Events nofoa, lea na totogi ai pasese o tagata e toalua mo nofoa faapitoa ile vaega ole Business Class, ae ole isi toatolu na totogi lava pasese e malaga mai i nofoa masani.
Ole isi itu oloo masalomia ai e le moni manu‘aga o Fury, ona ole Aso Faraile ole vaiaso na tea nei na faia ai sana faatalanoaga ma le nusipepa ale Mirror i Peretania, na ia faailoa ai lona saunia mo le fusuaga.
Na ta‘ua e Fury i lea talanoaga, ua mae‘a ona faaaasa uma ona ogaumu, ma ua sauni foi e malaga mai i Niu Sila e fao ese atu le fusi ma Parker.
Ile faaaliga ale pulega, ua tolu vaiaso talu ona faamanu‘alia Fury, peitai, o totonu ole tolu vaiaso lea, e lei malolo lava folafolaga ma faasalalauga a Fury ma lana pulega ile lelei ma le saunia lelei o latou tapenaga, mo le faatoilaloina o Parker.
Ole Aso Faraile lava lea na faailoa ai e Hughie Fury ile Mirror ua faavevela uma ona ogaumu ma ua sauni e fusu, ole aso foi lea na ta‘ua ele pulega, na taofi ai ele fomai Fury e tatau ona malolo mo le fā vaiaso.
Ole faalua lea ona tolo ele pulega a Fury le fusuaga, ole masina o Aperila lea na fuafua e faataunuuina ai le fusuaga, peitai, na toe tolo mai ia Me ele pulega a Fury, ona o tuuaiga sa molia ai Hughie ma lona tausoga o Tyson Fury ile faaaogaina o fualaau faatupu malosi.
Ole isi lea mafuaaga ua lagona ai tele le faanoanoa ole pulega a Parker ona ua faalua ona faaletonu le fusuaga ona ole itu lava a Fury.
E ui lava i nei faaletonu, peitai, na faaalia e Frank Warren oloo pulea fusuaga a Fury, ole a faia sana faasalalauga faalauaitele ise taimi ole vaiaso nei, e tusa ole tolopoina ole fusuaga.
E foliga mai oloo iai le faamoemoe o Warren e toe faataunuu lava le fusuaga a Parker ma Fury ise
taimi ole tausaga nei i totonu o Peretania. O ia faasalalauga a Warren oloo lilivau ai Segialii David Higgins, na ia ta‘ua ai, e le mafai e Frank Warren ona faia ni faasalalauga faapea, e aunoa ma le talanoa mai.
E oo lava i manu‘aga o Fury, e lei fesootai mai Warren ia te ia, o tala mai le auffaasalalau lea na iloa ai ua lē oo le fusuaga, ae leai ma se fesootaiga ale pulega a Fury ia te ia.
E iai le faamoemoe ose taimi ole vaiaso nei ole a mautinoa ai se isi e luiina le fusi a Parker ile aso 6 o Me.
Ole fusuaga mulimuli foi lea a Parker i Niu Sila, pe afai e manumalo i lana fusuaga o loma nei. O isi ana fusuaga ole a sosoo ai, e mautinoa o Peretania poo Amerika ole a agai iai, ona ole tele o faamanuiaga tau tupe e maua i fusuaga.
