E tasi le milona tala ($1000,000) pe a manumalo le Manu Samoa i le taamilosaga o le Ipu o le lalolagi 2015. E limaselau afe tala ($500,000) pe afai e ausia e le Manu Samoa le Final. Ae luaselau limasefulu afe tala ($250,0000), pe afai e ausia e le Manu Samoa le Semi Final, e tusa lava pe faia‘ina ai.
O nisi ia o luitau tetele tau seleni, a o ni faamanuiaga foi o le a feagai ma tama taaalo o le aulakapi a le atunuu, i le sauni atu ai mo le taamilosaga tele a le lalolagi i le tausaga fou 2015 (Rugby World Cup 2015). O ia seleni e pei ona ofoina ma ua faalauiloaina, o se vaega o le lagolago a le kamupani ua avea nei ma sponsor, le Cromwell and Redifine i le lalolagi atoa, faapea se tasi o lana tautua i Niu Sila o loo lauiloa ai le Oyster.
O le afioga lava i le Taitaifono o le Iuni lakapi a Samoa, o le Palemia foi o le atunuu le susuga ia Tuilaepa Fatialofa Aiono Neioti Lupesoliai Sailele Malielegaoi, sa faalauiloaina faalauaitele le tāua o le maliliega aloaia ua osia nei a le Manu Samoa, ma le kamupani a le Cromwell and Redifine Oyster.
E le gata sa saunoa e faalauiloa le kamupani ma lana lagolago, ae o se saunoaga foi e fai ma sui o le Iuni lakapi a Samoa (SRU) e faailoa ai le talia fiafia ma le loto faafetai o lea faamanuiaga o le a fai pea ma luitau i soo se tama taaalo o le Manu Samoa, a o tapena atu mo le Ipu o le lalolagi i le tausaga fou.
Sa ta‘ua e Tuilaepa, le faatoa mae‘a ai o le pisi o le malo o Samoa ma le atunuu atoa i lana taligamalo mo le fonotaga a atunuu tauatiae o Malo Aufaatasi, ae sosoo ma lea faatinoina o lea foi tala fiafia, e pei ona faamauina, ma aloaia i le taeao o le Aso Gafua, aso 8 o Setema.
O lea sauniga aloaia sa faataunuuina lea i le kalapu a le Barbarian i totonu lava o Eden Park, i Aukilani Tutotonu. Saunoa le taitaifono, o le aumaia o le lagolago a le Cromwell, faatasi ai ma le saunia atu o le All Blacks mo lana taaloga ma le Manu Samoa i Samoa, o se tulaga e matuā tāua tele, e toe tutu‘i ai le fu‘a a Samoa i le pito i luga o au malolosi o le taaloga lakapi i le lalolagi atoa.
I lea lava saunoaga a Tuilaepa, sa ia toe ta‘ua ai foi le tāua tele o le taimi ma suiga fou ua faia e le fono faatonu o le lakapi a le lalolagi, le IRB mo tama taaalo, ua fesoasoani tele mo le faaleleia ma siitia ai tapenaga a le Manu Samoa mo le taamilosaga o le Ipu o le lalolagi e pei ona taulai i ai le vaai a ‘au uma ma atunuu o le lalolagi.
Ae o se saunoaga a le Taitaifono o le kamupani a le Cromwell and Redifine i Ausetalia, Aferika, UK, Europa, faapea le pulega a le Oyster, ua i Niu Sila, le susuga ia Geoff Levy, sa ia ta‘ua ai e faapea, o le taimi nei, ua tatau ai ona amanaia ma ave le lagolago i le sao o aulakapi malolosi o loo faafiafiaina le lalolagi atoa, e pei o le Manu Samoa.
Saunoa Levy, e faapea i luga atu o penefiti tau seleni a le kamupani, a o le lakapi o se taaloga e fiafia tele i ai, ma sa maitauina ma le toto‘a, o le Manu Samoa ua tatau ona ave i ai se lagolago ina ia saga faatumauina le malosi i lona taumafai mo le taaloga i le lalolagi atoa.
O nisi o vaega o le lagolago a le Cromwell, e le gata i seleni e pei ona ofoina o loo ta‘ua i luga, ae faapea foi le faapipiiina o lona igoa i le lima o le ofu poo le jersey o le Manu Samoa i le agai atu mo le Ipu o le lalolagi 2015. O le a aofia ai foi nisi o faailoilo i malae ma isi lava fesoasoani, o le saga faalauiloa ai faiga paaga a le kamupani ma le aulakapi a le Manu Samoa.
E lei gata i le taitaifono o le kamupani le faia o se saunoaga e faailoa atili ai mafuaaga o le faiga paaga, peitai sa oo lava foi i le faauluuluga o le kamupani, le susuga ia Paul Weighman, sa ia toe faaopoopo i le faatāuaina o le Manu Samoa i le latou filifiliga sa faia. Saunoa Paul e faapea, o le Manu Samoa, o loo numera fitu i le faasologa o au pito i luga o le lalolagi, peitai o se aulakapi e muta ma utiuti alaga‘oa o loo atinaeina ai le taaloga.
Ae ui lava i lea, sa ia faatoilalolina le tele o au malolosi a le lalolagi atoa, ma o aulakapi o loo lava tapena i le tulaga o mea faitino e faaaogā mo le sailia o le malosi, ma le lagolagoina o tama taaalo. Saunoa foi Paul, e talitonu la latou kamupani, afai ae lava alaga‘oa e faaaogā e fesoasoani i taleni a tama Samoa, o le a tulai mai le Manu Samoa, o se aulakapi numera tasi i le lalolagi i se taimi e lē o toe mamao.
O lea foi sauniga aloaia, sa auai faatasi nisi o alo ma tamafanau Samoa sa matuā iloga la latou tautua i le All Blacks a Niu Sila i taimi ua tuanai. O le susuga ia Olo Brown, Joe Stanley, Dyllan Mika, Laauli Michael Jones, faapea Vaaiga Tuigamala, ma le afioga ia Tuifaasisina Bryan George Williams, sa avea ma faiaogaulu mo le Manu Samoa. O Tuifaasisina, o le Peresetene lea o le kalapu a le Barbarian i Aukilani, o ia foi lea sa faafeiloaia le taitaifono o le Iuni lakapi a Samoa, ma lana aumalaga.
O le Aso Lua, aso 9 o Setema, na malaga ai le taitaifono o le Iuni lakapi a Samoa, le susuga ia Tuilaepa Sailele Malielegaoi ma le aumalaga i Ueligitone, mo le sainia o le maliliega tusitusia a Iuni lakapi e lua, Samoa ma Niu Sila. O lea maliliega tusitusia, o se faamaoniga lea o faamatalaga ua leva ona faasalalauina, o le malaga a le All Blacks i Apia mo le taimi muamua i talafaasolopito o le lakapi. O lea tulaga sa faamaonia mai e le afioga i le taitaifono, o le alii Palemia o Samoa, i se feiloaiga ma le Samoa Times.
O e taumafai e faaofi le Manu Samoa i totonu o le taamilosaga o le Super Rugby?
O le fesili lea a le Samoa Times, sa tuusa‘o lava i le afioga i le taitaifono, Tuilapea Sailele Malielegaoi mo sona finagalo. Ae o le tali mai e faapea, Ioe o le isi lena maga ma se mataupu o loo faauatu i ai talanoaga ma fonotaga o loo faia nei. Sa toe faamanatu mai e le taitaifono le tausaga muamua sa auai Samoa i le taamilosaga o le Supa sefulu, a o lei suia i le Super Rugby. O le tele o taaloga a le Manu Samoa i le Supa sefulu, sa matua taetaei ai ulu, gaugau lima ma vae, ma manunu‘a le toatele o tama taalo a isi au, ona o le malosi tele o ponaivi o tama o le Manu.
E mai lava la i le vaitaimi lena, o loo matuā fefefe tele au a atunuu o loo i le Super Rugby i le taimi nei, e toe fia taaalo ma le tatou ‘au, o le mafuaaga foi lea ua fiu ai e toe tau uga le mataupu lenei, a ua fefeu, ona o le palaai. Ia ae lē afaina, o lea lava e ugauga mālie mo le taimi nei, seia iai lava foi ona taimi sa‘o e toe faamalosi ma tulei ai ina ia faasa‘o lea sese sa iai. Ua mae‘a foi ona lui e le Tuilaepa le IRB i le mataupu lava lenei, faatasi ai ma le tele o isi mataupu o loo punitia ai le atinaeina o le lakapi i atunuu o le Pasefika. O le taeao o le Aso Lulu aso 10, o le a toe taliu ai le faigamalaga a le Taitaifono ma le pulega o le Iuni lakapi a Samoa i le atunuu.
