EFKAS Kelston ma le latou faifeau fou Rev Sakaria Taaseu ma lona faletua

EFKAS Kelston ma le latou faifeau fou Rev Sakaria Taaseu ma lona faletua

E sefulu tasi masina ma aso e sefulu fa sa nofo faatalitali ai le akalesia EFKAS i Kelston i le sailia lea o se latou faifeau, ona ua tuua e le susuga i le faafeagaiga ia Rev Oto Tumanu ma lona faletua ia Repeka le galuega ae malaga atu i Ausetalia e saili matagi aua lava manuia o aiga. I totonu o nei masina ma aso e sefulu fa, na vaaia ai e le susuga i le aoao ia Levaa Niulesa Simiti le ekalesia, ma sailiili pea i le Alii aua se taitai na te tausia le lafu mamoe i Kelesetone.

Sa iai se tasi o aoao ma lona faletua e leo mafai ona faailoaina o laua suafa sa muamua fesootai iai le aulotu o lea ua mananao iai le ekalesia e filifilia i laua e tausia le tovine, peitai ane sa faafaigata ona talia e laua le manaoga o le ekalesia, aua sa tali mai, sei nonofo muamua e fai o laua aiga. Sa talia fiafia e le aulotu i Kelesetone le tali a le faifeau. Sa toe talanoa matafale o le aulotu ma tatalo ma tuu atu pea i le Atua le manaoga o le ekalesia mo se leoleo mamoe. Peitai ane e le tuulafoaina e le Atua manaoga o lana fanau, ma o lea sa faailoa i le aulotu e iai le aoao faauuina mai i Malua ia Rev Sakaria Taaseu Kuini ma le faletua ia Malama Taaseu Kuini e tausia le galuega.

O ala o le Atua e leo ala ia o le tagata, o manatu o le tagata e leo finagalo lea o le Atua. O auala ma fesootaiga a le ekalesia EFKAS i Kelesetone ma le susuga i le aoao ma lona faletua sa faafaigofie mea uma ma talanoaga i luga o telefoni e pei ona fesootai muamua iai le susuga le aoao ia Levaa ma faailoa ai le manaoga a le ekalesia, mulimuli ane ona alu lea o le savali a sui o le aulotu e feiloai ma le aoao ia Rev Sakaria ma le faletua ma alaoaia ai le manaoga ua naunau iai le ekalesia mo laua.

Na talia fiafia e le susuga i le aoao le savali aua ua laua iloa ma talitonu o le taimi o le Atua mo laua, e galulue ai e faatino lo laua valaauina e pei ona ofoina ai lo laua soifua. O le aulotu e toatolu matafale, ae sa talia lava e le susuga i le aoao lea fuainumera aua e leo le numera ae o le taimi o le Atua mo le tagata e taua. Ua iai foi lo laua talitonuga e toe tapenaga e le Atua nisi tagata mo le lafu mamoe i Kelesetone.

Susuga i faafeagaiga ma o latou faletua o le pulega EFKAS i Aukilani

Susuga i faafeagaiga ma o latou faletua o le pulega EFKAS i Aukilani

O le taeao o le Aso Toonai na osi ai loa le feagaiga a le ekalesia EFKAS i Kelesetone ma le susuga i le faafeagaiga ia Rev Sakaria Taaseu ma lona faletua ia Malama. O se aso fiafia i aiga na lua, faapea uo ma e masani aemaise o susuga i faafeagaiga ma o latou faletua o le pulega o le EFKAS i Aukilani, ina ua militinio faatasi tagata uma e molimau faatasi le lelei o le Atua e ala i le feagaiga osia i le ekalesia ma le latou leoleo mamoe.

O le susuga i le faafeagaiga ia Rev Mafutaga Faaleaoga o le taitai o le pulega a le EFKAS i Aukilani sa taitaiina le sauniga, ao le susuga i le faafeagaiga ia Rev Fenunuti Ioane sa manavaina le upu faauuina a le Atua.

Ua maualuga ma mamalu le faamoemoe o le ekalesia ona ua auai mai ai le toeaina ia Rev Lucky Slade ma lona faletua aemaise o susuga i faafeagaiga ma o latou faletua na malga mai i Samoa. O le susuga i le aoao ia Levaa Niulesa Simiti sa fai ma sui o le ekalesia e saunoa i le lipoti e tusa ai ma le feiloaiga ma le latou faifeau fou ua iai nei.

Na taualuga polokalame o le aso i le taumafataga tele na saunia e le ekalesia EFKAS i Kelesetone ma faaiu ai loa i faaaloaloga masani lea sa oloa luuluu ai le mamalu o le auvalaaulia.

O le susuga ia Tuu Matavai sa fai ma fofoga o le aso ma o ia foi sa momolia le agaga faafetai o le ekalesia i le paia auvalaaulia faapea le aufaigaluega a le Atua ma Samoa potopoto sa auai i le molimauina o le aso fiafia o le ekalesia EFKAS i Kelesetone.

O le susuga ia Rev Sakaria Taaseu ma lona faletua ia Malama na ulufale i le kolisi faafaifeau i Malua i le tausaga e 2005 ona faauu lea i le tausaga 2010.

Na tofia e vaaia le ekalesia EFKS i Sasaai peitai ane e lei maea le laua tolu tausaga ae malaga mai loa i Niu Sila nei e saili manuia mo le la’ua aiga. Sa galulue i le susuga i le faafeagaiga ia Rev Taeaofesilafai Lavasii ma le faletua ia Miriama i Titirangi, ona valaau loa o le ekalesia EFKAS i Kelesetone, mo laua lea ua see mai ai loa ma galulue e avea ma faifeau i totonu o lea ekalesia.

Pei ona molimau le galulue vavalalata o le EFKS ma le EFKAS i  galuega faapenei pe afai ae manaomia e le EFKAS se faifeau e mafai lava ona galue mai ai se aoao ua faauuina mai i Malua.