O le malae na amata mai le West Tigers i Leichardt Oval sa manatu e taunuu ai sa latou malo mataina i le Canberra Raiders i le Aso Sa ina ua luasefulu minute o le afa muamua o sili a latou ai 22-0. Na sikoa le alo o Samoa ia Tim Simona faatoa lua minute o le taaloga sosoo ai ma le sikoa a Keith Galloway i le minute lona ono.
O le sikoa lona tolu a le Tigers na atagia ai le taleni maoae a leni ‘au i se pasiga na sikoa ai Luke Brooks ae faasala ai Jack Whiten i lana pue ia Tim Simona. O le sikoa lona fā a Pat Richards na iloa ai foi e lei taitai lava le uigi lenei a le Tigers.
O se pue malosi a Iosia Soliola ia Luke Brooks o le Tigers na suia ai loa le taaloga ma toe ola mai ai le Raiders. O sikoa a Shannon Boyd ma Jarrod Crocker na lalata ai ‘ai o le taaloga faaopoopo ai ma le sikoa a Frank Paul Nuuausala lea na matagā le vaai o lana fia fusu i isi tama Samoa o le Tigers ia Sauaso Sue ma Martin Taupau. Na sili ‘ai o le Raiders i sikoa a Jack Wilton ma se sala na ova a Jarrod Crocker mo ‘ai 24-22.
Na lē malolo foi osofaiga a le Tigers aemaise lava i lana foueki i le saili avanoa atu i le laina sikoa ma kiki kalapa ai e Robbie Farrar le polo pe tusa ma le lima mita mai le laina ma sikoa ai Luke Brooks i le minute 76 ma ono manumalo ai. Ae peitai na lē taulia i le faaiuga a le laufali fai mai sa i luma Brooks ma toe osofai mai ai loa le Raiders ma sikoa i toe sekone mai le latou uigi o Jordan Rapana mo ‘ai faaiu 30-22.
O se taaloga uiga ese aua sa sili le Tigers i le ‘afa muamua.
Canberra Raiders 30 (Shannon Boyd, Jarrod Croker, Frank-Paul Nuuausala, Jack Wighton, Jordan Rapana sikoa; Jarrod Croker 5 kiki) manumalo ia Wests Tigers 22 (Tim Simona, Keith Galloway, Luke Brooks, Pat Richards sikoa; Pat Richards 3 kiki). Aofai 13,198. Malologa: 22-12.
