O upu masani ale atunuu, e manatua pule ae galonimo Faalaeo. O lagona foi ia oloo nofo fale ia Satuiamaa i finagalo ole Ekalesia Emanuelu, pe a tomanatu ile soifua tautua ole tina ia Faamasamasaletai-o-aana Zoll.
Ole tina ia Faamasamasaletai-o-aana Zoll, poo Masa e pei ona lausilafia ai, na soifua mai ile masina o Aokuso ile tausaga 1924 i lona afioaga o Moataa. O lona tuaa o Mati Asi Faasau. Na faaipoipo atu ia Otto Zoll, ma e toalua o la alo o Fritz ma Otto Zoll.
E lauiloa le tina ia Masa Zoll i lana tautua ile Atua e ala lea ile Ekalesia Emanuelu, o ia faatasi male tina ia Maina Jones, sa amataina uluai fono tatalo ale Outreach Groups ile tausaga e 1978.
Ole tausaga e 1981, na galulue faatasi ai ma nisi o aiga, ma amata ai le Mafutaga Tatalo ma Faamalologa ale Emanuelu, o Masa sa taitaia le mafutaga ile taimi na faavae ai.
Ole tausaga e 1982 na aloaia ai faaletulafono le Emanuelu Christian Fellowship Incorporation poo le Ekalesia Emanuelu, ma tofia ai loa Masa e avea ma uluai Peresitene ole Emanuelu. O lana matafaioi autu, ole taitaia lea o Fonotalalo faapea foi le a‘oa‘oina o tagata ile Afioga Paia ale Atua. Sa ia finau malosi e faamalosia le olaga o tagata e mafuta ile Atua e ala ile tatalo, ma tapu‘e le loto naunau o tagata e tala‘i atu le suafa o Iesu Keriso. O nisi o galuega sa ia taulamua ai e aofia ai asiasiga ile Falepuipui, e momoli le suafa o Iesu Keriso ma lana Talalelei i uso ma tuagane oloo nofosala ile toese.
E lē gata i lea sa ia unai malosi foi tala‘iga i nofoaga faitele, e ala i pesepesega male laugaina ole Upu ale Atua i nofoaga e pei o Fleamarket i Otara ma Panmure faapea le tele o nofoaga e pei o taulaga faatau e tumutumu iai tagata.
Ole tausaga foi lea e 1982, na lafotuina ai Masa ma lona aiga i faanoanoaga, ona ole valaau paia ale Atua i lona alii ia Otto Zoll, na maliu le tamā ole aiga ile vaalele ale Air New Zealand lea na pa‘ū i Mt Erebus ile 1982. O Otto Zoll ose tasi o pasese i lea faigamalaga.
E ui lava i nei mafatiaga, ae sa atili ai ona malosi le faatuatua ole tina ia Masa ile soosooina ole Talalelei a Iesu Keriso, e ala i lana taitaiga ole Mafutaga ale Emanuelu sa tofia ai e avea ma Peresitene, ae o ia foi ole Faifeau Sinia (Senior Pastor).
Sa taitaia e Masa se ‘Au Faapitoa (Special Team), faapea ma tupulaga talavou, mo galuega tala‘i i Upolu, Savaii, faapea foi Ausetalia ma totonu o Niu Sila nei.
Ole toatele o tupulaga sa auai i nei galuega tala‘i, ua foai atu lo latou ola e tautua ai mo le Atua e ala i tofiga faafaifeau i ekalesia faa-Penetekoso ma ekalesia Emanuelu. O fua lelei nei o galuega ole faatuatua sa taulamua ai le tina ia Masa. Ose molimau lea ale faletua ia Talosaga Puletiuatua, i sana faamatalaga ole latou mafutaga male tina ia Masa.
Ole tausaga e 2004, na malolo manumalo ai Masa mai lona tofiga Peresitene male tofiga Faifeau Sinia ole Emanuelu. E ui lava ua malolo manumalo o ia, ae oloo tumau pea ona amanaia o ia ole Faifeau Sinia ale Ekalesia e oo mai ile taimi nei.
Ole vaiaso na tea nei sa faamanatuina ai le 92 tausaga o lona soifua, faatasi ma ona aiga i lona alalafaga i New Lynn i Aukilani. E pei ona molimauina e susuga i faafeagaiga o Mika ma Maria Lagavale, o fua lava o faamanuiaga ale Atua ile tina, a‘o malolo ma avea pea ose fautua mase tina tatalo mo auauna faafeagaiga male ekalesia aoao.
Na saunoa le faletua ia Maria, “Ose tina sa tuuina atu atoa lona tagata ma lona loto mo le Atua, ose tina sa faavae lona soifua tautua ile faatuatua ola male alofa ia Iesu Keriso.
E oo mai lava ile taimi nei ua atoa le 92 tausaga o lona soifua, oloo tumau pea le matala o lona mafaufau e talanoa mai ai ma faasoa mai i Afioga Paia ale Atua”. Ole susuga i faafeagaiga pastors Mika Lagavale male faletua ia Maria oloo la vaaia le lala ale Emanuelu i Papatoetoe, ole susuga foi ia Mika Lagavale ole Peresitene ale Emanuelu Aoao, ae sui taitaifono ai le faafeagaiga o Tanuvasa Eric Toomata.
