Photo : Charles Palesoo (Digiliah Photography)

Photo : Charles Palesoo (Digiliah Photography)

E lua lava mea tāua ile soifuaga o Albert Tupuola poo le afioga ia Safuiane e pei ona lauiloa ai ile ata tifaga ole Matai, o lana aganuu ma lona aiga.

O vaega autu foi nei o lona olaga na taulai iai lona mafaufau a’o tilotilo ma vaavaai se tamaitai e avea ma rosa mātala i lona olaga.

Ole tolusefulutasi o tausaga o Safuiane faatoa ioe ai lona loto ile tamaitai ole a avea ma ana manamea e faavavau ina ua ia mautinoa, ose tamaitai e alofa faamaoni i lona tina ia Wendy Faapoi aemaise lona aiga. Ole tamaitai na filifilia e Albert o Rebeca Apelu Fenunuti, ma ole aso mulimuli ole tausaga 2017 na faapaiaina ai lo la aiga fou ile sauniga mamalu na faataunuuina ile malumalu ole Kolisi o St Pauls i Ponsonby, sa molimauina e aiga ma uo aemaise a la ekalesia.

Ole avea o Albert ma tama autu ole ata tifaga ole Matai, e lē ose moemitiga na tupu a’e ma ia, peitai, ose avanoa lelei na ia maua ina ua mae’a se feiloaiga ma le Faatonu ole Southseas Pictures. Na uluai amata ile ata tifaga ole Faamagalo, sosoo ai ma le ata tifaga ole Matai e pei ona lauiloa ai nei e soo se Samoa ile lalolagi atoa ile suafa Safuiane.

E lē na’o ata tifaga le taleni a Albert, ae ole siva e pei ona lauiloa ai foi i lana ausiva logologoā ole Tatau.

Photo : Charles Palesoo (Digiliah Photography)

Photo : Charles Palesoo (Digiliah Photography)

O vaiaso taitasi uma lava e sisiva ai lava le Tatau.

E le gata i Niu Sila ae o Ausetalia. O taaloga ale Manu Samoa ma le Toa Samoa, e faafiafia ai foi le Tatau e tele foi valaaulia ole Tatau mai atunuu i fafo, ose avanoa oloo faalauiloa ai ele Tatau tu ma aganuu a Samoa.

I lona soifuaga i totonu o lona aiga na fanau o ia i Ausetalia, mai ona mātua o Sepelino Tupuola ma Wendy Faapoi. Ina ua tetea ona mātua a’o laitiiti o ia, ona faafailele toatasi mai lea e lona tina o Wendy seia oo mai lava ile taimi nei. “O Albert o lo’u tuagane, ae lē malolo ai lava le fasi e oo mai lava ile taimi lenei,” ose vaega lea ole molimau ale tuaa o Albert le tina ia Wendy Faapoi ile la mafutaga ma si ana tama.

E talasua Wendy o Albert o lona tuagane. Na ia ta’ua foi, a oo ina otegia ma fasi Albert, e tootuli atu si ana tama i ona luma ma faatoese atu i sona sese, ae ole auga atoa ole faamoemoe o Wendy, ia mafai ona maua e Albert le amio pulea ma le usitai.

Photo : Charles Palesoo (Digiliah Photography)

Photo : Charles Palesoo (Digiliah Photography)

O itu nei oloo vaaia lava ia Albert e oo mai ile taimi na faaipoipo ai.

O uiga lelei foi nei o Albert na molimauina ele Faatonu ole ata tifaga ole Matai. “Ose alii e vave tele lana pue, poo le ā lava le uumi o ana laina e tuuina atu e a’o, e tautala mai lava Albert ile taimi e faatino ai ana vaega ole ata tifaga, e tautala mai lona loto, e faigata ona iloa o ni laina na a’o. O Albert oloo faatinoina le tama autu ole ata, o ia o Safuiane ose alii talavou na faasuafaina ile suafa Sa’o o lona aiga.

Na ta’ua e Albert, ose fiafiaga tele ia te ia le ata tifaga ole Matai, e le gata e tele lesona aogā oloo maua e tagata mai le ata, ae oloo telē foi se tāua ole ata mo ia lava i lona olaga, aemaise le faaatoatoaina o lona fiafia ma lona faananau ile aganuu a Samoa. “O soo se mea lava oute alu iai, e valaau lava a’u e tagata ia Safuiane, o nisi foi taimi oute tau matamuli ona ole Matai ua na’o se ata tifaga, ae o mafaufau ole toatele o tagata e fiafia ile Matai, ose mea moni lava.

Ole taimi nei oloo i Samoa le afioga ia Safuiane ma lona faletua ia Rebecca, e asia aiga aemaise le tina matua o Albert ia Marina Schaffhausen, ole tuaa o lona tina ia Wendy ua 81 tausaga lona matua, e lei mafai ona auai mai ile faaipoipoga.

E manatua pea e Albert ma Rebecca lo la aso fiafia, ona ole sagisagi fiafia mai o aiganalua, uo ma ē masani, aemiase a la ekalesia, na avea ai lo la aso fiafia o se aso e faagalo gata ile toatele.

Faamatalaga na tuuina mai

Comments

comments