Letioa foi a fai le tala i le motu o Savaii, o le motu faimea mafai, e ui lava e lē o se taulaga mo Samoa ae vaaia lava le ola finau o ona tagata.
O le ofi mai o le paopao o tamaiti faimaumaga mai Savaii i faalagamaea o fusuaga a Niu Sila, ua tele ina faateia ai le toatele i le telē o le taleni o loo taotaomia pea e alo ma fanau i totonu o afioaga i Samoa, e lē gata i Apia a o le motu tele foi i Salafai.
O le alii o Farani Tavui, o loo nofo nei i Samoa ma tausi lona aiga, ae ua maua lona avanoa e ofi mai ai na te toe sosooina le fau e ala i fusuaga o le Super 8 e pei ona sue siamupini ai le alii o Vaitele Soi mai Vailele, Vaovai i Falealili, ma Taga i Savaii i le tausaga ua mavae.
O le fiafiaga sili foi lea i le toatele o la aiga ma le atunuu ona ua mafai ona malaga mai nei alo o Samoa e faailoa ma tauave pea le tagavai o Samoa i le lalolagi. O se faamanuiaga tele mo mātua ma aiga aemaise o afioaga i nei avanoa, ae lē gata i lea o le sui mai i Apia ma le sui mai i Savaii.
O Vaitele Soi sa maua le faamanuiaga mo lona aiga i le tausaga ua mavae i lana taavale ina ua mae‘a lana fusuaga o le Super 8, ma o se alii fusu malosi toe loto atunuu, ua ia tatalaina foi le faitotoa mai le kamupani o le Sky TV e lagolagoina ai isi ona uso o loo mulimuli mai e pei ona maua ai e le alii o Farani Tavui lenei faamanuiaga.
O le lelei tele o lenei alii i ana taaloga ua faafaigofie ai lava ona ioe le Sky TV latou te lagolagoina soo se tasi o mulimuli mai ia te ia. E lē gata i le taumafai o Vaitele Soi a o le tu‘itu‘i malosi foi o le taitai o le Event Polynesia le faautautaga ia Teleiai Pa‘u Edwin Puni ma lana faalapotopotoga i lenei lava kamupani ina ia malosi lo latou sosoo tau‘au mai auā lava le taumafaiga mai o alo o Samoa o loo taotaomia le taleni i totonu o le atunu.
“Ua taunuu ai le upu a le tufuga tape‘a i lenei taitai, o le tamaloa e tele lona tino ae sili ai i le telē o lona loto.” O se tasi o sini autu o lo galulue agai i ai le Event Polynesia mo tatou tagata Samoa o le taumafai e lalaga mai le taleni ma le agavaa o loo i fanau, ina ia maua ai se faamanuiaga mo aiga.
O le aso 28 o Mati lea o le a tapuaia ai e Samoa o loo alala ma papaaao i Niu Sila, fusuaga a nei alo o le atunuu, lea o le a faataunuina i Kaliesetete. E toalima i latou o le a fetaui ai i lea afiafi, o le alii o Jai Opetaia, Monty Filimaea, Falani Tavui, Monty Betham ae taualuga i le paga a le alii o Vaitele Soi lea o le a ia lu‘iina ai fusi e tolu o le faaitulagi lenei o loo umia e le alii siumupini mai Ausetalia o Anthony McCracken.
