Ole fesili autu ole vaiaso, poo ai ole a fusu ma Joseph Parker. Ile mae‘a ai ole fusuaga ma Alexander Dimitrenko ile po ole Aso Toonai, na alalaga ai male leo tetele lava le vaega ale Duco Events, ile maoae o faiga ale latou tama – Laauli Joseph Parker.
“Ole matuā maoae a ole fusuaga a Joseph Parker. Ua tapena ai nei Joseph mole fusi ole lalolagi.” O ai ole a fusu ma Joseph Parker ile masina o fou?
Ile taimi nei, oloo tumau pea le fusuaga a Joseph Parker ma David Price mole aso 26 Novema male fusuaga a Anthony Joshua.
O ai e fusu ma Anthony Joshua?
E lei iloa lea mea. Ae e foliga mai, o lo’o mana’o le vaega a Joshua e fusu le latou tama ma Vladimir Klitchko.
O fea na oso mai ai Klitchko?
O Klitchko na tuu e fusu ma Tyson Fury ile aso 29 Oketopa. Ae ua tolopo le fusuaga lea ina ua faaletonu Tyson, pei e ma‘i. Ua faamaonia lea ile tusi ale fomai a Tyson.
Ole faalua ai lea ona tolo e Fury le fusuaga, mai le aso 9 o Iulai na tuu e faataunuuina ai, peitai o lea foi ua toe tolo le fusuaga sa fuafua mole aso 29 o Oketopa.
O le ā le tulafono o ia fusuaga?
Talu ona manumalo Tyson Fury i fusi ale WBO, WBA male IBF ile aso 28 Novema 2015, ole tulafono ia fusu Tyson Fury ile 12 masina.
Ole fusi ale WBA na tatau on fusu i totonu ole 9 masina. I tulaga oloo aliali mai nei ile ma‘i o Fury, ua mautinoa ai ole a lē faataunuuina le fusuaga ma Klitchko; e manino lava le tulafono ile se‘ia o fusi oloo ia Fury ona ua lē mafai ona fusu e puipui fusi nei i totonu ole 12 masina.
A se‘ia la fusi a Fury e pei ona talanoaina, ona avanoa lea o fusi ia e saili se isi e fusu iai.
Aisea e lē o manao ai le vaega a Anthony Joshua e fusu ma Joseph Parker?
Ona ole tupe. Ole oso o AJ e fusu ma Klitchko, ona ole tele ole tupe e maua ai. Ae lē gata i lea, ole tuufaatasia lea o fusi ale WBA, WBO, IBF.
Ae faapefea Parker?
E sa‘o le fesili lea, auā o Parker ole paga sa‘o lea a Anthony Joshua, (mandatory) ile faasologa ale IBF. O Parker e numera tasi ile IBF, ae o Joshua oloo ia umia le fusi. E lē o iai se tulaga o Klitchko ile faatulagana ale IBF ae o lea ole a oso fusu ile fusi ae oloo faatali Parker oloo numera tasi. Ile tali i lea fesili, e iai le sao o AJ i lalo ole tulafono ale IBF, e fusu ai ile tagata oloo umia le fusi ma soo se tasi lava, a‘o faatali le fusuaga male “mandatory challenger”.
O tulafono ale IBF oloo faataga ai ona filifili ele tagata oloo umia le fusi se isi tama la te fusu, a‘o faatalitali le taimi e fusu ai male numera tasi poo le mandatory challenger, i totonu ole taimi oloo faatapulaa mai ele IBF e tatau ai ona fusu le numera tasi ma lē o ia umia le fusi. Ile tulaga o Parker o Fepuari ole tausaga fou, e faamuta ai le taimi e faatali ai Parker mo Joshua.
O lona uiga la, e mafai lava ile taimi lenei ona fusu Joshua ise isi tama fusu e ese mai ia Parker ile va ole taimi lenei ma Fepuari 2017.
Ole ā nei le isi laasaga mo Parker?
A fusu Anthony Joshua ma Klitchko, ona taumafai loa lea o Duco Events e sue se fusuaga a Parker ma se isi mole fusi ale WBO. Ua faailoa e Duco Events, o lo latou manaoga, ia fusu Parker ma Andy Ruiz mole fusi ale WBO.
O fea e oso mai ai lea fusi?
Oloo ia Tyson Fury le fusi lea, ae a aveese le fusi lea mai ia Fury, ona avanoa lea ole fusi lea mole siamupini fou. O Parker, e numera tasi ile WBO, o ia e iai le avanoa muamua e fusu ai ile fusi lea ale WBO. O Parker foi e faia le filifiliga ile tagata ole a la fusu ile fusi lea.
O fea tonu la ole a taoto ai le faamoemoe o Parker?
Ole vaiaso nei ole a maua ai le faaiuga mautu.
A mautinoa loa le fusuaga a Klitchko ma Anthony Joshua, e foliga mai ole a agai loa Joseph Parker e fusu ma Andy Ruiz. O lea fusuaga, oloo faamoemoe lea e faia i Niu Sila.
O ai lenei tagata o Andy Ruiz?
O Andy Ruiz ose alii Mexico oloo nofo nei i totonu o Amerika. Ua 29 ana fusuaga faapolofesa, e leai se faia‘ina, 19 manumalo i tu‘ioti. Ua 29 tausaga o lona soifua, e 6ft 2inisi lona maualuga. Ile taimi nei oloo faatulaga ele WBO Ruiz ile numera tolu, faatusa ia Parker oloo numera tasi.
Ae faapefea le avanoa mole fusi ale IBF?
E lē aveesea lea avanoa. O Joseph Parker lava e sosoo e lu‘i le fusi lea. O lona uiga, poo ai lava e malo ile fusuaga a Joshua vs Klitchko, o Parker e sosoo. Ose mea lelei lea, auā a manumalo Parker ile fusi ale WBO (pe faia‘ina), oloo iai le fusi ale IBF mole isi ana fusuaga. Ole isi itu lelei poo ai lava o Joshua ma Klitchko e malo, e mafai ona fusu ma Parker mo fusi uma e fā ale lalolagi pe afai e malo Parker ia Andy Ruiz.
E iai nisi suiga?
Ole taaloga lenei e tele suiga e tulai mai i lea taimi i lea taimi, e ono iai foi nisi suiga. Peitai ole faaiuga ole vaiaso nei e ono manino ai le tele o vaega oloo faanenefu ile taimi nei.
