Ua fiu sailiga e le maua se faamatalaga tonu mai iai latou e saili iai faamatalaga ale Malo poo ā auga ole gasegase ole afioga ile Palemia susuga Tuilaepa L Sailele Malielegaoi, lea na mafua ai ona motusia tiute tauave ole taitai ole Malo ile Aso Lulu ua mavae ae auina atu ile maota gasegase i Motootua ma taofia ai ile numera tigaina le Intensive Care Unit poo le ICU.
Na fiu e saili ile aoauli o lena aso e le maua se faamatalaga ae ua na’o ni molimau na faapea mai e leai se mea ole a sailiili ai fua ele tusitala lea tulaga. Mo le silafia, ole Palemia ole taitai ole Malo ma le atunuu, e tatau ona silafia e tagata uma faamatalaga tonu ma sa’o pe a oo ina aafia le soifua maloloina ole Palemia. Ole pitolaau lea ale autusitala ma le aufaasalalau ae le ose suesuevale e pei ona faaseā mai ai nisi sa fesootai iai.
Ole aoauli ole Aso Lulu ua mavae na taofia ai le Palemia ile falemai, ae ina ua oo ile po ole aso lea sa mafai ona talanoa atu ise tamaitai tausi soifua sa tiute ile numera sa taofia ai le taitai ole Malo ma ia faailoa mai ai, ua faasolosolo manuia ma ua mafai ona savalivali solo le alii Palemia.
Na faailoa mai foi e se isi molimau faatuatuaina ile po lava lea, ole a ave atu i Niu Sila le taitai ole Malo ile po lava lea, ae e le o mautinoa pe faatoa malaga ese ma le atunuu ile po poo le taeao ole Aso Tofi e sosoo ai. Na faailoa mai foi ele molimau, ose vaalele ave ma’i poo le air ambulance ole a aveina ai le Palemia i Niu Sila mo ni siaki faafomai.
Na faailoa foi ele molimau na silasila ile medical card oloo faaalia ai ua tau aafia le fatu ole afioga ile Palemia ma e aafia foi i auga ole gasegase ole toto maualuga.
Na faatoa maua mai le faamatalaga ise pepa o faasalalauga faalauaitele mai le ofisa o faamatalaga ale Malo le Presssecretariat ile aoauli ole Aso Tofi ua mavae ma faailoa ai le auina atu ole Palemia i Niu Sila mo ni siaki faafomai.
Oloo faailoa ai foi se finagalo ole taitai ole Malo oloo ta’ua ai ele susuga Tuilaepa e leai se mea e faapopoleina ai le atunuu. “Ole taeao nei na tuua ai le atunuu ele Afioga ile Palemia, Tuilaepa Dr Sailele Malielegaoi mo suesuega faafomai i Niu Sila.
Ae lei tuua ele Taitai ole Malo le atunuu na ia saunoa ai e faapea, “E le ose tulaga e faapopoleina ai le atunuu le faafuaseia o lo’u malaga atu i Niu Sila mo suesuega faafomai. “E ui ile mae’a o suesuega faafomai i Motootua ae ua ou taliaina fautuaga mo nisi suesuega e moomia i Niu Sila”. “Oute talitonu oloo faatasi mai lo tatou Atua ile Lagi ina ia toe taliu mai ma le manuia le faigamalaga.” Na pau lea ole faasalalauga mai le ofisa o faamatalaga ale Malo.
