Na leai se tasi e lei vaaia ni loifofoga maligi ma le ootia a o tulai le tamaitai o Sarah Taito ma faasoa mai le pagatia, maualalo ma le pumoomoo o lona olaga teineitiiti sa faatama‘ia e faiga faasotoma ma le pologa na aafia ai o ia.
Talofa! I le tauaso o le alofa moni ma le lē iloa e se tasi o le avega mamafa na masofasofa ai ona lagona ma lona olaga.
O le afiafi o le Aso Toonai, aso 12 o Aperila na potopoto ai le toatele o nisi sa mafai ona auai atu i le fia faafofoga i le talaaga mafatia sa aafia ai le tamaitai o Sarah Taito. Sa tuufaatasi lea mafutaga e ala i le lagolago malosi a le Toomaga mo ē Puapuagatia i Kuiniselani, lea o loo faauluulu i le faletua ia Eseta Frost ma le latou ofisa.
O le tamaitai o Sarah na aafia i nei sauaga faatoa 5 ona tausaga, e mafua mai i le toalua o lona tina. Sa soifua a‘e o ia i Ausetalia ae o mātua o lona tina sa faifeau i se alalafaga i le atu Falealili na mafua ai ona oo atu i Samoa ma aumau ai.
I lea vaitaimi sa tele ina pisi mātua o lona tina i le galuega ma meafai a le lotu, ae na toe aafia ai foi o ia i se tasi o ona uncle ae na o le 8 ona tausaga. O nisi o vaega ogaoga o lona olaga na tauau ina muta ai lona soifua ma o se laupepa e susue gatā ma faagalo gatā. Na umi le faamatalaga i faafitauli na aafia ai Sarah Taito na tauau foi ina oo atu i ona uso peitai na faasaoina i latou ae ua amoina e ia le mamafa.
O le 12 o ona tausaga na toe taliu mai ai i Ausetalia ona o le pologa o le olaga sa ola ai i Samoa ma sa sili atu foi le mafatia ina ua toe taliu mai, e pei ona ta‘ua e Sarah sa lei maua se fiafia i totonu o le aiga. E misa i taimi uma seia oo lava ina tuuina atu i latou ma ona uso i le Foster Care o iina sa tau maua ai se saolotoga.
O se tasi vaega sa mafatia ai o le fia feiloai i lo latou tamā moni, peitai o le isi lea laasaga faigata i le taumafai o lo latou tamā e faaulaula maruana latou ma oo ai lava ina toe taliu atu i Melepone.
Sa ta‘ua e Sarah ma ona uso, o ai lava nisi o alo ma fanau tamaitai o saisaitia pea i lalo o sauaga faapenei ae lē o mafai ona faailoaina ona o le fefefe, o le taimi lenei e tatau ona faasaoloto lou agaga e pei o le manulauti a le Toomaga, “It’s Time to Speak, Heal and Live”.
