Ose ipu e inugata ele toatele pe a tu‘itu‘i atu ni leoleo ma logoina se tasi e pele ile aiga ua maliu. Ua lē maugagana, ua sola manatu ma lagona, ua toe tomanatu ile taimi na ulufafo ese atu ai male manatu maualuga e toe feiloai lava ile afiafi, ae pagā lea, pei e lē talitonu ile tala ua pa mai, ua gausia le laau malosi sa paologia ai le aiga ma tapa iai i taimi uma ole loulouā ma taimi ole solo lelei.
Ole afiafi ole Aso Gafua 22 o Aokuso 2016 na logo aiga male toatele aemaise le matagaluega SISDAC a Kuiniselani ise tala faavauvau, ua maliu faafuasei le susuga ile alii tiakono, le susuga ia Li‘a Steve Tauamiti, i lana galuega sa feagai ai. E tupu mai lenei faalavelave, ae na o laua ma se tasi o tausoga ole aiga o lona paolo sa la toalua.
Ole galuega ta laau (Tree lopping) na afua ai le faalavelave. Na molimanao se ulugalii e teu se laau i lo latou fanua ona e lata i laina o uaea eletise malolosi ale Malo.
Na a‘e le susuga ile tiakono ona valaau ifo lea e manaomia le lou se‘i tulou ina ia aveese ai ia lālā, peitai o iina na tupu ai le faalavelave ina ua sipaka Steve ma maliu ai ao ū lona tua i laina uaea eletise ola ale Malo.
E tusa male molimau ale susuga ia Poasa Peni ina ua faatalanoa ele susuga ia Setiu Iakopo Togipau, o ia lea na iai tonu ile taimi na tupu ai le faalavelave. Na ia ta‘ua e faapea, o ia sa kilia esea lālā ma galue i lalo, a‘o Steve i luga ole laau. Ole toe lālā lava lea na totoe, sa taumafai Steve e faauma ae na avea ma ala na sipaka ai ma maliu ai o ia.
Na ia vaaia le lou ua lavea ile uaea eletise ae oloo uu e Steve, seia oo ina pa‘ū ifo i lalo, ae oloo mau pea Steve i luga ole laau ona o lona fusipa‘u a‘e.
E tupu le faalavelave e lē o iai le aiga e ona le galuega, o lea na momo‘e ai Poasa i aiga tuaoi ma o latou faafesootai ai leoleo ma taavale ale falemai mose fesoasoani peitai, e taunuu ane ua fai sina tuai ua maliu lava le susuga ia Steve ile taimi na sipaka ai.
Ise faatalanoaga foi a Setiu Iakopo male tina faavauvau ia Eseta Tauamiti na ia faaalia ai lona misia osi ana tane i totonu ole la aiga. Ose tui tiga male oona pe a toe tomanatu ile mafutaga auā e tuumalo Steve ua toalima nai o la alo. O ona toe sauniga faaleaiga na faia ile afiafi ole Aso Lulu 31 o Aokuso ile Ekalesia Aso Fitu Samoa Tutoatasi, ae ole Aso Tofi aso 1 o Setema na tuuina ifo ai lona sā i lona nofoaga lē tumau, e faatali ai le aso e toe Afio mai ai lona Alii sa ia auauna iai ma lona loto fiafia, i aso faaiu o lona soifua tautua.
Ia faamaise le Agaga ole Atua ile tina ia Eseta male nofo a alo, faapea aiga e tusa male mafutaga male tamā ole aiga ua motusia faafuasei, ona o faalavelave e lē ma‘alofia. “Amuia ē faanoanoa, aua e faamafanafanaina i latou.”
