Ua faailoa ele Pulega a Joseph Parker, ua aveesea le latou talosaga ile malo mo se tupe e faataunuu ai le fusuaga a Parker ma Andy Ruiz. Na ta‘ua e Dean Lonergan ile talanoaga ma le Samoa Times, ole maua o lea alagatupe ole a matuā faigata ai ona fai i Niu Sila le fusuaga e pei ona faamoemoeina. E foliga mai, ua ise vaega ole 80 pasene le agai atu i Amerika ole fusuaga e fai ai.
E lei faailoa e Duco pe fia tonu lava le aofai ole seleni oloo sailia. Fai mai e “fitu fuainumera” ae ole “tupe Amerika” foi. O lona uiga oloo saili mai le malo se vaega tupe e $1.6m tala Niu Sila.
E lē na ole pau lea ole vaega e maua ai tupe ole faamoemoe. E aofia ai “Sponsorship”, “Corporate Sales”, “Pay Per View”, “TV Rights”, “Ticket Sales” ma le fesoasoani tau tupe lea mai le Malo.
Ole saunoaga a Dean Lonergan, e ao tutusa lava le seleni e tatau ona maua mai i vaega uma ia. A faapea la e ta‘i $1.6m, faatele ile ono, ona maua ai lea ole seleni e latalata i le $10m Niu Sila, e faatino ai le faamoemoe.
Na faailoa foi e Duco, ole vaiaso nei e maua tonu ai le faaiuga pe fai i Niu Sila le fusuaga pe leai. Ile fesiligia o Duco pe aisea e faanatinati ai le faamoemoe mo le aso 10 o Tesema?
Na tali mai e faapea, a siliga ma le aso 10 o Tesema, ole aso mulimuli lea ole aufaipisinisi ona o ai lea e malolo mo le Kirisimasi, faatoa toe foi mai ile faaiuga o Ianuari. Peitai, ole amataga o Fepuari e feagai ai le Duco Events ma isi ona faamoemoe e iai le NRL Nines (Lakapi Liki i Eden Park) ma le Brisbane Global 10s (Lakapi Iuni) i Brisbane.
O lona uiga, a siliga ma le aso 10 o Tesema, faatoa mafai la ona toe fai se isi fusuaga a Laauli ile masina o Mati 2017. Ose taimi umi tele lea pe a lē toe fusu Parker ile va lea.
Ona ole telē ole lelei ua maua i toleniga ma fusuaga sosoo a Laauli e tatau ai ona faaauau pea ana fusuaga. A umi la ona lē fusu, e lē ose tulaga lelei lea mo ana tapenaga auā lona faamoemoe ile fusi ole lalolagi.
Na iai la le faamoemoe tele ale Duco Events ole a talisapaia ele Malo le latou talosaga. Peitai, na tele le faaseā ma le faitio o tagata lautele o Niu Sila, ile maimau o tupe ole a totogi ai le fusuaga a Joseph Parker.
Ole mafuaaga lea ole toe aveesea ole apalai a Duco ile Major Events NZ, le matagaluega ale Malo lea e faatupea taaloga faapenei, ona o lea faaletonu ma le vaai a tagata lautele ile kamupani ale Duco Events ma ana galuega.
Oloo malaga atu nei i Amerika Lonergan mo talanoaga ma le vaega a Andy Ruiz. Ole alii o Bob Arum, lea e faauluulu iai Andy Ruiz, o ia lea e faatautaia le fusuaga pe a see ese ma Niu Sila.
E matuā faamoemoeina e Lonergan ma Duco Events le fai mea mafai o Arum ma lana kamupani ole Top Rank ile faatinoina ole fusuaga ale latou tama ma Joseph Parker. Peitai, atonu ole a sui ai le aso ole fusuaga ma isi aiaiga tāua o tapenaga faapenei. Ole isi lea tulaga oloo taumafai le Duco Events e alofia, auā ole a tele ai foi le avanoa e ono malo ai Ruiz ile la fusuaga ma Parker.
Ae ole taumafai pea ole Duco Events e saili se tupe tele e faatino ai le faamoemoe ona ole maualuga ole totogi a Joseph Parker ua oo iai. E foliga mai a laitiiti se tupe a Parker e maua ile fusuaga pe ose mea ile va ole $5m ma le $10m.
Ole tupe totogi lena o fusuaga faapenei mo le siamupini ole Lalolagi. E ui e na ole tasi le fusi, ole fusi lea ale WBO ole a faipele ai Laauli ma Ruiz, ae e ao lava ona ausia e Parker se aso totogi faapea.
E lē na‘o Parker, ae faapena foi ia Ruiz e tatau ona lelei foi sona totogi e maua, faapea le totogi o tagata uma ole a fusu i lea po. Ole a tatou faatalitali pea mo lenei vaiaso mo se faaiuga o lenei faamoemoe tāua, poo Niu Sila poo Amerika ole a faataunuu ai.
