O se fesootaiga mafanafana a le kalapu lakapi iloga i Sinile Pittwater Rugby Club ma le Samoa Sportstar Radio FM 89.3 ua mafua ai le moomia mai pea e lenei kalapu o ni alo lakapi Samoa talavou latou te tapenaina ma atinae mo le lumanai i Sini nei.
O le Peresetene o lenei kalapu ia Dave Hawkeson na saunoa muamua i luga o le polokalame Samoa lenei ma amata saili ai i le lua tausaga talu ai ni fanau Samoa e agavaa i le laina i luma ma tua, ma o se alii Samoa na aami e lenei kalapu i le 2013 ia Justice Snowball ua avea nei ma se sui o le aufili U16 a Sini Sisifo.
Saunoa Dave Hawkeson o le toatele o a latou sui iloga e agai atu i le Wallabies e aofia ai Mark Gerrard ma nisi o loo taaalo i le Waratahs ma le Brumbies i le taimi nei. O le aami o le Peresetene e molimauina taaloga o le sisigafu‘a a Samoa i Sini na ia vaaia ai le tele o le taleni e lē o mafai ona maua avanoa konekarate e faailoa ai lo latou agavaa.
O le tausaga nei ua amata saili atu foi ni tama Samoa se toafā e amata atu i le au U14 a Pittwater ma e leai se totogi o resitala ma togiga e mātua auā o le a saunia uma e le kalapu. Ua silafia e lenei kalapu o le mafuaaga lea o le motusia o avanoa o le tele o tamaiti Samoa o le taugata o pili e totogi i le lakapi. Saunoa foi Dave Hawkeson o le taaloga a le Manu Samoa lea na manumalo ai i le Wallabies i le 2011 na maualuga ai loa le manaoga mo tama Samoa talavou e fia auina atu e atiae e le kalapu talu ai le vaaia i lea matati‘a i le 2011 le matautia o le pue a le aufili a Samoa.
O loo valaaulia mātua e faafesootai le telefoni 0406117912 pe a silafia ni alo ma fanau e moomia lea avanoa lelei e saili manuia ai mo fanau talavou o loo fuafua e fia avea ma tama lakapi lelei mo le lumanai.
