O loo i Niu Sila se faigamalaga a le Malo o Samoa o loo taitaia e le afioga i le Alii Palemia, le Susuga Tuilaepa Lupesoliai Sailele Malielegaoi i se taumafaiga ina ia unai pea galuega faavaitaimi ua ofo mai e Niu Sila mo tagatānuu o Samoa.
O se polokalame ua manino le tele o le fesoasoani e le gata ia Niu Sila o loo saili pea tagata faigaluega mo le faatinoga o galuega nei ua lē o toe toatele tagatānuu o Niu Sila latou te faatinoa, ae mo Samoa foi latou i le unaiga o avanoa faigaluega mo ona tagata.
O le faafitauli e pei ona toe laga mai e le Malo, ua toe tulai mai foi nisi o faaletonu i amio a nisi ua maua atu avanoa e galulue ai i faatoaga o laau‘aina i itumalo ua maua ai nei galuega faavaitaimi.
Ua iai nisi ua lē usitaia aiaiga e pei ona iai le nonofo ai i Niu Sila i lalo o lenei polokalame. O nisi foi o le onanā lava ma le lē usitai ua faapea ona laga ai faaseā a kamupani o loo maua mai ai nei galuega faavaitaimi.
Ua tele afioaga aemaise o tagata taitoatasi ua mafai ona maua fesoasoani nei e ala i avanoa ua tuuina mai, ae o le tulaga lava lea e lapatai ai pea le Malo aemaise o le Alii Palemia, auā o loo i lalo o lana matagaluega le polokalame lenei, i le ta‘uvalea ai o Samoa i faiga a nisi toaitiiti ua lē usitaia aiaiga o le nonofo ma galulue ai i totonu o Niu Sila.
O lea foi na laga i le tausaga na tea nei e le taitai o le Malo a toe maua lava nisi o fai ni uiga lē migao ma le lē mafaufau i Niu Sila, o le a faasala uma lava le nuu e agai atu ai ma faasā soo se tasi e agai mai i afioaga o tagata ua faapea ona faamaonia solitulafono i Niu Sila, e lē mafai ona toe maua avanoa faapenei, ae e foliga mai o loo iai lava nisi e lē o usitaia lava faiga nei.
O lea la ua toe agai le alii Palemia e talanoa ma kamupani o loo maua mai ai avanoa faigaluega atoa ai ma tagata o lo tatou atunuu o loo galulue ai i lalo o lenei polokalame.
O le faafitauli lava lenei ua lagalagā pea ma e lē na o Samoa foi ua vaaia ai ia faafitauli i le lē taupulea o amio a nisi ua auina atu mo nei galuega, ae o se tasi lenei o fesoasoani tele ua faapea ona molimauina le tele o le tamaoaiga ua liligi mai ai mo aiga ma afioaga aemaise ekalesia.
