Ua valaauina nei e le Matagaluega o le Soifua Maloloina i lana vaega o auaunaga lautele le fesoasoani a aulotu i totonu o Samoa e faamalosia le tuipuipui o fanau o le atunuu.
O le sili atu i le 20% (pasene) o fanau a le atunuu mai i pepe fou seia oo atu i le matutua o le lima (5) tausaga e lei faia o latou tui puipui.
O se gaioiga ua vaaia ai le toatele o fanau a le atunuu ua aafia ma vave apoia i le tele o faama‘i sa tatau ona lē toe aafia ai pe ana faatino a latou tuiga e pei ona masani ai mai i tausaga ua mavae.
O mātua lava o loo tuuaia i le lē toe amanaia o lenei vaega tāua o le soifua maloloina o le tamaititi a o tuputupu a‘e ma o lea la ua agai le matagaluega ma taloina se fonotaga ma sui o afioaga aemaise faafeagaiga ma o latou faletua i afioaga uma o Samoa ina ia fesoasoani e faamauina ma unai ma le mautinoa o fanau uma a aulotu e faia o latou tuipuipui.
O gasegase eseese e aafia ai totoga o fanau, o le pipili, o le apoia i soo se faama‘i e afea Samoa o nisi ia o faafitauli e tulai mai pe a lē tuia fanau i tuipuipui amata mai lava i le fanau mai o le tamaititi.
Faaalia e Fuapepe Manuleleua, o le taitai tausi soifua e nafa ma tuiga o fanau, o loo toatele lava tina e fai tuipuipui o fanau i le taimi lea faatoa fanau ai le pepe ma o loo i totonu o le vaaiga a le falemai ae agai loa i aiga ua lē toe faamalosia fuaga o tamaiti e pei ona sa iai i tausaga ua mavae, ma o le faamoemoega lava o le faataunuu o tui o fanau o tina ma e agai lava i falemai e faatino ai ae ua lē toe faia lenei tulaga ma tele ai lava le aafiaga o le mama‘i ma maliliu o fanau laiti.
E tele lava ina faatoa toe vaaia lava fanau nei ina ua agai atu i le aoga ma o iina i le lima o tausaga o le fanau e faia ai lo latou tuipuipui faaiu.
O le fesootaiga ua tapa mai i aulotu na ta‘ua e Manuleleua e tāua tele auā o loo lolotu le toatele ma o iina e mafai ona agai atu i ai le soifua maloloina e faatino galuega e moomia mo tuipuipui o tamaiti, ae a leai o le fesootaiga ma faifeau e ala i fanau ua papatiso i ekalesia eseese ma ua faamauina uma e aulotu fanau ia.
O le faamoemoe o le polokalame ina ia toatele fanau e faasao mai i le aafia o olaga mulimuli ane i le mau ma‘i ua pepesi solo aemaise o gasegase tumau e aafia ai ona ua leai se puipuiga e tatau ona latou maua a o iai i se tulaga maaleale o latou soifua.
