O le masina fou o Oketopa pe a toe taliu ane i le laumua o le Ekalesia Katoliko i le lalolagi le malaga a le Faaao o le ekalesia le afioga Pope Faranisisi, lea o le ia asiasi atu ai i le Iunaite Setete o Amerika, o le a faafeiloai ai e se sāvali o sui talavou e to‘a 12 mai atunuu o le Pasefika.
O le a filofilo ai ma se alo tamaitai o Samoa o Raedena Solomona mai le vaega o tupulaga talavou o le Toomaga mo ē Puapuagatia poo le Samoa Victim Support Juniors.
O le autu o lenei malaga i Roma a ia alo talavou o le Pasefika o le molimoli lea o se feau tetee filemu i le afioga i le Pope ina ia faaleo ai le mataupu o suiga o le tau ma aafiaga o le lalolagi aemaise o atunuu laiti o le Pasefika.
O le autu o le feau molimoli ia lagona e le Vatikana, o le faaaogāina o fossil fuels poo kasa oona o loo puaina atu i fafo ma mafua ai ona afaina ai le osone o le lalolagi e fesootai ma suiga o le tau.
O le iesae Samoa mao‘i o le a momoli e le tamaitai o Raedena i le Faaao o le Ekalesia Katoliko i le lalolagi, o se faailoga lea o le nutimomoia o loto o tagata Pasefika i aafiaga o suiga o le tau mai kasa oona a falegaosi oloa ma kamupani a atunuu tetele o le lalolagi ma mauoloa.
Na oo le sui o Samoa i le Aki Epikopo le afioga Alapati Lui Mata‘eliga mo ni ana faamanuiaga a o lei malaga ese ma Samoa i le amataga o le vaiaso nei. Na ia afea foi le afioga i le Palemia mo nisi faamanuiaga.
“O oe o se talavou mai le Pasefika o se toa ma se misionare o le a faaleoina lenei feau tāua”, o se finagalo lea o le Aki Epikopo i le tamaitai talavou.
Na faailoa e le Palemia i le tamaitai o Raedena a leai se gaioiga tatau e faia i kasa oona mai malosiaga o fale gaosi oloa o le a matua ogaoga ni aafiaga o atunuu laiti o le Pasefika. O le faamalosi lea a le taitai o le Malo ma le atunuu i lenei tamaitai talavou ona o le a fai o ia ma vaaiga o tupulaga laiti o le atunuu ma le Pasefika e tauaveina lea feau tāua.
Faaalia e le Peresetene o sui talavou o le Toomaga le susuga Nathan Ryan lona agaga fiafia e lagolagoina le faamoemoe o tupulaga talavou o le Pasefika i le taua faasaga i aafiaga o le lalolagi i suiga o le tau.
Faaalia e le alii peresetene o loo manino le feau tau molimoli e lē o malemo le faamoemoe o tupulaga ae o loo finau ma tau le taua.
