O le alii Egelani o Damian McGrath lea ua filifilia e avea ma faiaoga taiulu o le Manu Samoa i lana aulakapi taitoafitu ma o le vaiaso na tea nei na faamautu mai ai e le Iuni lakapi a Samoa lenei tofiga ua tele masina o faatalitali i ai le atunuu talu lava le tulai ese o le afioga Fuimaono Dickie Tafua mai i lea tofiga.
O le tele o masalosaloga ma taumatematega na muta uma lava i le vaiaso na tea nei ina ua faamautu mai lē o le a avea ma faiaoga. E lei aofia le suafa o McGrath i le tele o talanoaga ma matematega o lea tofiga se‘i vaganā ai Waisale Serevi lea sa faiaoga ma taalo i le taitoafitu a Fiti, o Brian Lima faapea ai ma Ben Collins o Peretania foi peitai o le suafa lea na filifili i ai le Iuni Lakapi o se alii ua tele tausaga o galue o se faiaoga lagolago i le taitoafitu a Egelani i tausaga ua mavae ae na tele atu lona taimi e faatino ai polokalame o le taitoafitu mo i latou i lalo o le 21 tausaga le matutua a Peretania lava.
Faaalia e Faleomavaega Vincent Fepuleai le ofisa sili o le Iuni Lakapi a Samoa, e to‘a 29 lava talosaga na filifili mai ai le lisi o tagata e toavalu lea na filifili mai ai loa lenei alii. Ta‘ua e Faleomavaega o le tele o le tomai o lenei alii i le taaloga lava ia o le lakapi taitoafitu na mafuli i ai le filifiliga a le Iuni Lakapi a Samoa.
Faaalia e lenei alii le faafetai i le faaiuga ua tofia ai lona tagata mo le vaaiga ma le toleniga o le au taitoafitu a Samoa, ma na ia faaalia o le ‘au a le Manu Samoa o se tasi o ‘au malosi i lenei taaloga ma o lana galuega o le unai o polokalame ina ia mautinoa e agai pea i luga taumafaiga a le ‘au a le atunuu.
E lē gata i le lakapi Iuni ae o se alii foi lenei ua leva ona avea ma faiaoga lagolago i le taaloga o le Lakapi Liki mo le ‘au a Egelani i tausaga ua mavae ma ua silia i le 20 tausaga lana tautua i le aoaoina ma le avea ai ma faiaoga i ‘au taitoafitu a aoga, Iunivesite aemaise kalapu ma le ‘au tele a Egelani.
Ua tele ina faitioina le tulai mai o le ‘au taitoafitu a Samoa i lenei vaitaimi aemaise lava i le feagai ai ma le taamilosaga faavaomalo a le Lakapi a le Lalolagi lea e faagasolo i tausaga uma, lea foi na manumalo aoao ai Samoa i tausaga ua mavae. O le mafuaaga lea o le umi na filifili ma tau saili le Iuni Lakapi a Samoa mo se faiaoga o le a faapea ona tauaveina tapenaga a le ‘au tele lenei.
O le taaloga tele lea e alo atu i ai le taitoafitu ina ia ofi atu i ai, o le taamilosaga o le taitoafitu i taaloga o le Olimipeka i Rio ma o le taumafaiga lea a le ‘au aupito lata mai a o lei sauni foi mo le isi taamilosaga faagasolo o le taitoafitu a le Lalolagi i le agai atu ai i le tausaga fou.
