O le tuufaatasia o le susuga i le alii Aoao ua iu mai Malua i le tausaga ua mavae, susuga ia Iuma Patrick James Ah Poe, na matuai papatutui ai le malumalu o le susuga i le Toeaina ia Rev Tauaaga ma le faletua ia Reeta Mataafa i le Aso Toonai 14 o Aperila.
O le alii Aoao o se lupe faalele a le alalafaga o Leulumoega Tuai, o se alo e faasino ia Samoa Vaafusuaga Peter & Tafaoga Ah Poe. O le tamaitai faaipoipo o Ulalemamae Si‘a o le alo matua lea o Faavaeomalo A‘emalo & Penina Sipili (Vaovai Falealili).
Ua faamoemoe o le aso 5 o Iuni o le a malaga atu ai i Samoa a o tālia ai se nuu e valaauina i ai lo la soifua.
Sa taitaia le sauniga o le sakalameta o le faaipoipoga e le susuga i le Toeaina ia Rev Tauaaga Mataafa e faamalosiau i le ulugalii fou ina ia mataala i le malolosi o ave o le fili. O le susuga i le faafeagaiga ia Neti Seruka sa fai ma fofoga o le aso.
Sa tulai le susuga i le aoao fesoasoani ia Faavaeomalo Sipili aua se inati o le aufaigaluega ma Samoa na potopoto. Na auai uma le aufaigaluega a le Atua ma faletua. Na talifaitau le failautusi o le Papa o le Olataga le susuga ia Auala Setefano sa fai ma sui o le auvalaaulia e faafetaia aiga na lua. Tapenaina le taumafataga e le faleaiga a le Uncle Sam’s Poulava Sam ma Lona Matautia.
Faaiu i le tatalo e le toeaina ia Lauie Lupematasila, tapenaina taumafataga e le Uncle Sam’s. I le mae‘a ai o le aso fiafia o le A‘oa‘o, na tolaulauina ai le Felaugaaiga a susuga i Aoao ma faifeau mai Samoa ma NZ o loo talimalo ai Kuiniselani.
O le Aoao ia Lole Fiso sa lauga i le Ekalesia EFKS Brisbane Rev Milo Faaleava. O le susuga i le Aoao ia Feterika Motu mai Sili sa lauga i le Ekalesia a Rev Petaia Tuifao (Southside), Farani Tofilau mai Iva lauga i Loganlea, Kamuta Mataafa – Ekalesia a Kerita Reupena (Ipswich), Faifeau mai Satapuala o Rev Ailepata Leuta lauga i Southwest Brisbane, Rev Tunupopo Patū mai Leulumoega sa lauga i Northside, Terry Pouono faiaoga mai Malua e sikolasipi i Niu Sila lauga i le Lamepa o le Ola, Faiaoga Malua sikolasipi i Sini o Aigofie Marino lauga i le Sulu o le Talalelei, Faiaoga mai Malua o Peni Leota sa lauga i Westside, Faifeau mai Vaovai Samoa o Anoai Faletutulu sa lauga i le Ekalesia Logan City.
O Aoao e toalua o loo alala i Brisbane o Henry Ito sa lauga i Setima o le Ola, ma Simona Ene sa lauga i le “Le Petesa Fou”. O le Aoao e malaga mai Samoa Apineru Liaina sa lauga i Logan East.
O le toeaina Penisione o le PIPC, susuga ia Aotofaga Lemuelu sa lauga i le Ekalesia i Logaholme. O le alii faaipoipo, le Aoao ia Iuma Patrick James sa lauga i le Papa o le Olataga o le ekalesia lea a le tamaitai faaipoipo.
