O le alii talavou Samoa o Laauli Malietoa-Brown, ua lona 12 ai ia te ia i latou ua faamanuiaina i lenei faailoga, le Bill Clarkson Top Rider of the Year Award 2012, e pei ona sa faagasolo i Totara Park, mo i latou e lē atoatoa le malosi o le tino (Riding for the Disabled – RDA). O lenei tausinioga tietie solofanua na amata mai le tausaga 2001. O le susuga lava ia Bill Clarkson na ia tauaaoina atu le faailoga ia Laauli, ae na foai atu ai foi ia te ia ma ia foi faailoga, le Kiwibank Local Hero Medal, lea na faatino i le falemataaga, le War Memeorial Museum i le Aso Lua, aso 4 Tesema.
E to‘a 50 isi tagata sa tauva faatasi ma lenei alii laitiiti o Laauli, o nisi e matuā matutua atu lava nai lo ia, e iai foi ma se tasi ua 91 tausaga o le soifua, ae o loo fiafia lava e faaavanoa pea lona taimi ma ona tomai e tautua ai mo lenei faalapotopotoga mo le 21 tausaga.
O lenei foi tomai ua filifilia ma talenia ai le alii o Laauli, o se tomai lelei tele pe afai foi e fiafia ai nisi alo o Samoa, aemaise o se auala lelei e maua ai e fanau le uiga o le mautinoa i lona iloa e mafai ona ia faagutuina ma faatonutonu lelei se solofanua se‘i tulou.
O le mea moni, o loo toatele foi fanau a Samoa e iai o latou manaoga faapitoa, ma e latou te moomia lava le tele o le alofa ma le fesoasoani atu a o latou mātua ma aiga mo i latou.
E mafai ai foi e mātua ona saili ni taaloga e ono mafai e nai nei fanau ona fiafia ma latou mafai ona faatino, e pei foi ona iai le alii o Laauli, e lē gata ua maua ai lona to‘a ma lagona mautinoa i se tomai ua mafai ona ia faatino, aemaise ai le totō ifo i lona loto o lagona e alofa faapelepele i se meaola.
Faamalo atu ai le Samoa Times i le alii talavou o Laauli mo lona faailoga tāua.
