Ua talia nei se talosaga ua leva ona moemiti iai le Toa Samoa, ole tatala lea o tamafanau ua lē toe filifilia e Ausetalia, Niu Sila ma Egelani e omai ai e taaalo mole ‘au ale atunuu.
Ole vaiaso na tea nei na aloaia ai ele Faalapotopotoga Liki ale Lalolagi le faalēaogāina poo le soloia lea ole tulafono tuai, lea sa noatia ai le avanoa o tamafanau sa filifilia mo Ausetalia, Niu Sila ma Egelani, e taalo ai mo Samoa, Fiti, Tonga ma Papua Niu Kini.
O lenei suiga fou ole tulafono ole a mafai ai e fetu pupula e pei o Anthony Milford, BJ Leilua, Josh Papalii Joseph Paulo ma Josh Maguire ona toe foi e taaalo mo Samoa tusa lava pe sa filifilia ile State of Origin, Ausetalia pe sa taaalo foi mole Kiwi a Niu Sila.
E lē gata mo Samoa e faapea foi Toga ia Solomone Kata male alii o Jason Taumalolo oloo piki ile taimi nei mo Niu Sila. E toatele i tama e ono maua pea avanoa i lalo ole tulafono fou e taaalo ai mo ‘au ale Pasefika e aunoa male tanumia pe faamuta ai avanoa e taaalo ai faavaomalo pei ona sau ai muamua.
Saunoa le sui ole Lakapi Liki ale Lalolagi ia Tas Batieri, ua loa ona galulue male Toa Samoa, “Ole lelei o lenei suiga fou e fesoasoani ai i ‘au Pasefika ma Europa oloo tau atiae ae lē gata i lea ole a malolosi ai ‘au a isi atunuu e faafetauia Niu Sila, Ausetalia ma Egelani.”
I isi tala fiafia ua maua nei e Sam Tagataese ole Toa Samoa ma le Cronulla Sharks le faailoga tauoloa ale Lakapi Liki mo se tama taalo lelei lana taitaiga ma amio tausaafia o lenei tausaga.
Ole alii o Pita Godinet o Manly male Toa Samoa na ia maua foi le faailoga Tama Taalo ole Tausaga a Bob Batty ile Ipu a NSW 2016.
