Matagofie le aso o Tuaa Sinasina i Melepone

Tuaasinasina o le atunuu faapea sui o le Fono Faufautua sa auai i le faamoemoe
Tuaasinasina o le atunuu faapea sui o le Fono Faufautua sa auai i le faamoemoe

E ui i le tau faatutugata i taeao ona ua amata ona malosi le malulu i Melepone, ae na lagona le faagaeetia ma le agaga fiafia o le afioga i le taitaifono ma le mamalu o le Fono mamalu a Samoa i le aai le Fono Faufautua mo tagata Samoa i Vitoria, ona o le talia faatuaelele e le paia maualuga i tupu ma tamalii o le atunuu  tainane toe ulutaia ma tuaa sinasina, aemaise o le paia i faletua ma tausi a’o le faleupolu o tofiga ma Samoa na potopoto, ona o le taeao po pe tusa o le valu agai i le iva ae amata taunuu le paia lasilasi o Samoa, e tali i le valaau faaaloalo a le Fono mamalu mo le mafutaga faapitoa mo tuaa sinasina.

E le fou le faamoemoe lenei o le Fono, sa faatino foi i tausaga ua tuanai, ae o le Aso Toonai na tea nei, na maoa’e ai le lagolago a le atunuu i le toatele o tuaa sinasina na afifio ma talaaao ane e patipatia lo latou aso. Na  amata lava i le viiga i Matautusa e sulaina le agalelei faasoa o le Atua i le sauniga puupuu, o le afioga i le taitaifono  le fetalaiga ia Fuga Alofipo Ale na saunoa e faafeiloai Samoa na potopoto, talifuaitau le tootoo o Leulumoega le afioga ia Lealaitagomoa Heka ona aloava loa lea mole feiloaiga pei ona masani ai.

Na  mae’a le alofi o tamalii, ona tali lea o le malu o le taeao ma faamasani  tuaa sinasina ma le Fono a Samoa, aemaise o nisi o tamalii ma faletua na malaga asiasi mai Samoa lea na mati’e ai le faamoemoe. Na  mae’a le malu o le taeao sosoo ma faafiafiaga a atumotu eseese o le Pasefika lea na taualuga i faafiafiaga faa Samoa na saasaa ma sausaunoa ai tamalii ma tuaasinasina o le atunuu.

Na maua foi le taimi na fesiligia ai so latou finagalo i nisi o mataupu o fai ma anavatau a le Fono, sasaa le fafao ma saunoaina la latou tofa mamao ma le utaga poto i le faasoa, sosoo ai ma le taumafataga o le aoauli, ma faatino ai saunoaga faaiu o le aso ma toe faafoi ai le viiga i le Tapaau sili ona taape ai lea o le filialii ma le viiga sili o le Atua, ma le agaga o le faafetai.

O le Faafetai tele a le Fono Faufautua a tagata Samoa i Vitoria mo lo outou agaga lagolago ma le loto atunuu, faafetai tele mo ausiva na faafiafia, aemaise o le aao mafola i taumafa. Faamanuia le Atua i o tou faiva alofilima.