Faaalia e le Faamasino o le Faamasinoga Maualuga i Samoa, lona lē fiafia tele i le aafia o nisi o leoleo sa galulue i le toese i Tafaigata i se tasi o mataupu ua faasala ai nei se tamaitai Samoa ma se alii Niu Sila i le gaoi.
O lenei mataupu na tulai mai a o tuli le faasalaga faafalepuipui o le tamaitai o Vaioleti Stowers i le toese. Na ave faagaoi ai ni taavale totogi aso (rentals) e ala lea i lana paga na o la galulue faatasi i lenei solitulafono, le alii o Grant Holland o Niu Sila.
O lea alii na agai i fale taavale totogi aso e lua i Apia ma totogi ai le faaaogāina o ni taavale se ono. Na agai ane ma le tamaitai lenei a o i le toese i Tafaigata ua ave i ai taavale ma na taofia uma nei taavale i le lotoā o le falepuipui i Tafaigata.
O taavale nei na lē gata ina faatau i leoleo sa iai i le toese i lea taimi, ae o isi tagata o le atunuu ae na alu atu uma i Tafaigata.
O le faamatalaga a le tamaitai faamasino ina ua faasala le toalua lea i lea solitulafono, e matagā tele le iloa ane o le suesuega o leoleo lava sa aafia ai mai i Tafaigata na unaia le solitulafono.
O leoleo uma na suesueina ma maua ai le aafiaga i lenei mataupu ua faatea uma lava mai ia latou galuega i le toese i Tafaigata ma o nisi o loo faatali le tulai i le faamasinoga ona o lenei lava mataupu.
O le faaiuga o le vaiaso na tea nei lea faatoa tolaulau ai loa le iuga o Stowers ma Holland, ma o Stowers e lima tausaga ia ua faasala faafalepuipui ai ae o Holland e fā masina le sala faafalepuipui ae e tausaga atoa o le a nofo vaavaaia ai i le mae‘a ona tuli o lona faasalaga i Tafaigata.
O le mau a le Faamasinoga, o le tamaitai lava o Vaioleti Stowers lea na fafauina atoa le faatinoga o le solitulafono. Ua toe faafoi uma ane taavale nei i kamupani e lua na gaoi mai ai ma o taavale e toe faafoi lava ae ua mae‘a ona faatau atu i tagata nei e aofia ai ma leoleo.
Faaalia e le tamaitai Faamasino o Elizabeth Aitken e matuā matagā tele lenei faiga a leoleo ma e lē o ni gaioiga nei e tatau ona tausolomua ia i latou sa tatau ona puipuia ma faamalosia le tulafono ona o latou faatino.
O le mataupu lenei na amata ai lava le tele o suesuega lea ua vaaia ai le toatele o i latou na galulue o ni leoleo o le toese ua lē o toe faigaluega ai i lea nofoaga.
Na fetaui lava foi ma le suia o le pulega o Falepuipui lea ua tutoatasi ai nei ma ua iai lava lana ia Komesina ma ana tagata faigaluega ua faatautaia le vaaiga o le falepuipui i Tafaigata faapea le falepuipui o Vaiaata i le motu tele i Salafai.
