Ole Aso Toonai 29 o Aperila na alu toatasi ai le tafaoga ale alii fitafita ole sami a Niu Sila ose tamafanau a Samoa na ola ma soifua a‘e i Niu Sila. Ua faaalia e leoleo o lona suafa o Kilion Joseph Tua. O itula ole taeao ole Aso Toonai lea na taunuu ai le tafaoga a Kilino ile To Sua i Lotofaga.
Ole taimi ole a tapuni le nofoaga ile 6 ile afiafi na faatoa iloa ai le mea ua tupu ina ua ta‘ape le toatele na tafafao ile nofoaga ma taeele foi ile To Sua ae oloo tu lava le taavale e tasi ile paka poo le nofoaga e tutu ai taavale. Ole ato ma nisi o meatotino a Kilino na maua ise vaega ole To Sua oloo iai papa sosolo ae iai ma se matafaga oneone e tu ai se tamai fale e ato i lau.
Oloo masalosalo leoleo ole nofoaga tonu lea na ta ai ese galu le alii fitafita ma palasi ai i lalo ma tafea loa ile malosi ole aave ole au ole sami. Ole faamatalaga a leoleo oloo lagolagoina ele aiga e ana le nofoaga, ona ole faamatalaga ase tasi o taulealea oloo tapaina tupe a tagata pe a agai atu e fia taeele ma taafao ile nofoaga, ole Aso Toonai lea na matuā malosi lava le galu ma le aave ole au ole sami.
Ole fautuaga foi lea ale taulealea i tagata uma sa tafafao ile To Sua ile Aso Toonai lea ia faaeteete pe agai e taeele i lalo ole To Sua ona oloo malosi le aave ole au. Sa faailoa foi ele taulealea i tagata taeele e faaaogā maea oloo nonoa i totonu ole vai e pipii iai pe a malosi tele le tafe ole au.
Na logo leoleo i Lalomanu e pei ona faaalia ele Sooupu a leoleo ile afiafi ole Aso Toonai 29 o Aperila 2017 ile mea ua tupu ae peitai ole taimi lea ua pogisa. Ole Aso Sa na faatoa faatino ai le galuega a leoleo ma nisi ole nuu o Lotofaga na fesoasoani e saili le alii o Kilino. Na faaauau sailiga ile Aso Gafua ma le vaiaso atoa ua tuanai atu nei peitai e lei maua lava lona tino.
Ole taimi nei e lei faia se faaiuga a leoleo pe ua maliu pe o soifua pea le alii fitafita ole sami a Niu Sila ae oloo faia pea sailiga. Ole vaiaso ua mavae ina ua logotala lona aiga i Niu Sila na malaga ai i Samoa ona mātua mo le sailia o Kilino. Ose tala faanoanoa lenei mo aiga ma ana uo ona ole taimi muamua ua asiasi ai i Samoa ae tulai mai ai lenei tala faanoanoa.
