O le Pule sili o le ofisa o taaloga a le Pasefika susuga Falefata Hele Matatia i le ogatotonu, ma sui o le pulega o taaloga o le a talimalo ai Samoa i le tausaga fou

O le Pule sili o le ofisa o taaloga a le Pasefika susuga Falefata Hele Matatia i le ogatotonu, ma sui o le pulega o taaloga o le a talimalo ai Samoa i le tausaga fou

O faletalimalo i totonu o le taulaga o Apia o le a faamautu ai tagata taaalo o taitai ma ofisa o ‘au mai atunuu e 24, o le Pasefika o le a auai e tausinio i taaloga lona 16 a le Pasefika o le a faia i Samoa i le tausaga fou 2019. O se isi lea laasaga fou i taligamalo a Samoa aua o taaloga faavaomalo a le Pasefika sa faia i le atunuu i tausaga ua mavae, sa nonofo uma au taaalo ma ofisa o au taitasi i se nofoaga e tasi.

E 20 miliona le ofo a Samoa e faatupe ai taaloga o le 2019 ma o se isi vaega tele o lea seleni o le a masaa ma tafe atu i le auaunaga a faletalimalo, ma o se sao lelei foi lea o le taligamalo a le atunuu mo ia atinae tau tagata tafafao mai fafo.

E lei faamautuina poo a tonu faletalimalo i le taulaga o le a faamautu ai au taaalo ae o se tapenaga ua galulue ai le Pulega o Tagata Tafafao ma le asosi o faletalimalo faapea ai ma le komiti o tapenaga mo ia taaloga.

Ua faaalia e le Pule Sili o taaloga lona 16 a le Pasefika le susuga Falefata Hele Matatia, ua mafua ona a’e se finagalo e faatino lea fuafuaga ina ia mafai ona fesoasoani ai i le atinae o faletalimalo, peitai e ui e le o faletalimalo uma i le atunuu o le a faaaoga, ua faaalia e Falefata o faletalimalo ei tua atu o le lio o le taulaga o le a taumafai e agai iai tulisi ma tagata tafafao mai fafo e afea Samoa i le taimi o le a faia ai ia taaloga.

O le aso 7 o Iulai le aso Sa lea o le a tatala ai taaloga. E ui o le a faamautu foi tagata taaalo ma taitai o au i faletalimalo eseese i le taulaga ae e tasi le nofoaga o le a taumamafa uma ai. Ua tapena foi le komiti mo lea nofoaga o le a faaaoga ai se tasi o faletaaalo i Tuanaimato. O se isi fuafuaga ua faailoa e le Pule sili ma le pulega o taaloga o le fesoasoani a Saina o le a fausia ai se isi fale taalo fou i Tuanaimato ma le toe faaleleia o malae ma fale taaalo o loo i le Apia Park.

E lua nofoaga o taaloga o le malae taalo faavaomalo le Faleata Sports Complex i Tuanaimato ma le malae o le Apia Park.

O le puipuiga mo autaaalo uma ma tagata o le a auai ua faaalia e Falefata o le pitolaau lea a le Matagaluega o Leoleo ma ua taoto foi se komiti e faapitoa mo lea tapenaga. E 24 taaloga o le a tausinio ai ‘au taitasi ae ua faaalia e le Faatonu o taaloga a le Pasefika le susuga Aveau Niko Palamo sa talosaga mai nisi o atunuu e faaopoopo nisi o taaloga peitai e mulimulitaia lava e Samoa le tulafono o taaloga faavaomalo ma ua le talia ai le talosaga a isi atunuu.

O Niu Sila ma Ausetalia o le a auai a latou ‘au peitai ua aiaia le toatele o a latou tagata taaalo e tausinio i taaloga afeleti ona o taaloga a le Pasefika i le tausaga fou o le a avea ma se vaega o tauvaga e saili ai avanoa mo taaloga faavaomalo i atunuu e le o i totonu o le Pasefika.