“Ua ou mimita o se tagata Samoa ona o le maoa‘e o tapenaga”
Sgt Akerei Maresala Thomson
“Sa matou o mai faapea e lē o se tulaga lea o sauniuniga a le Malo ma le atunuu”
Constable Papaloa Talosaga
O le laufofoga fiafia o alii leoleo mai Niu Sila, o ni alo ma tamafanau a Samoa sa galulue ma se isi vaega toatele o alii ma tamaitai leoleo o Niu Sila i le taimi o le fono a atunuu laiti tau atiae o le lalolagi, ina ua maua le avanoa o le tusitala e fesilisili ai i ni o la lagona faaalia e tusa o le la silasila ma le mātau i le taligamalo sa feagai ma le atunuu.
O le sagisagi fiafia mai o nei alii leoleo sa vave ona aveese ai se lagona, a nei a fesili atu ae mata paū ma pupula a lalo mai, pe augata foi so la finagalo e tatala mai le la tofa faatagatānuu o Samoa sa soifua ma ola a‘e i Niu Sila aemaise o ni Malu o le Malo. O le faamatalaga a le susuga Akerei, e ese lona lagona i le vaai atu i le taupati o tagata uma e faatino a latou tiute i le taligamalo.
O alii ma tamaitai leoleo o le Malo Samoa e maeu le agalelei ane i le latou galulue ai. O se itu na ofo ai foi ona e taunuu mai, ae maua le faamatalaga o le latou aumalaga o le a nafa ma tiute o le puipuiga i totonu o le nofoaga o le fono faatasi ai ma nisi o alii ma tamaitai leoleo o le Malo o Samoa.
“O la‘u lava tala moni lau susuga, e ese le lagona ua oo ifo ona o le lelei o tapenaga. Sa ou faapea lava a‘u e lē faapea le tulaga o tapenaga ae maeu le matagofie o sauniuniga a le Malo a le atunuu atoa”.
O le lagona lea o le susuga Papaloa Talosaga, o se tasi o alii leoleo o le toa limasefulu o leoleo mai Niu Sila sa galulue i le nofoaga o le fono i Tuanaimato. “O a‘u lava ia i le taimi na faia ai le matou tautoga i le faamasinoga ina ua matou taunuu mai, na ootia lo‘u lagona ua maligi o‘u loimata ona ua oso ifo o‘u lagona o nisi o lo‘u aiga o loo galulue faaleoleo i Samoa, ma o nisi foi sa galulue faaleoleo ae ua lē o toe tautua”.
O le faamatalaga lea a le susuga Akerei ma ia ta‘ua na o ia lava le tagata o lo latou aiga o loo galue nei o se leoleo i Niu Sila a o le toatele o loo tautua faaleoleo i Samoa. Na soisoi le alii leoleo satini ma lulu lona ulu ma ia fai mai, pe ana le ola ma soifua a‘e i Niu Sila ma lona aiga semanu e faapenei o lea foi e leoleo i Samoa.
O le susuga Akerei o loo galue i le vaega o le matagaluega o leoleo a Niu Sila i le itumalo o Manukau, e faapena foi i le susuga Papaloa Talosaga. O le la tala mai e tele faafitauli o loo feagai ma o tatou tagata i lea vaega o Niu Sila aemaise lava la le solitulafono lenei o sauaina o tagata i totonu o se aiga.
O le la molimau o aiga nei mai Samoa o loo laki i le nofomau le quota, o loo tele ina aafia ai, ona o le latou sailiiliga e malaga atu e leai so latou silafia i tulafono a Niu Sila ma o se isi lea itu e pei ona la faaalia ua tatau lava ona faia i ai se fesoasoani, ina ia taunuu ma faamautu aiga i totonu o Niu Sila ua latou maua se silafia.
O le Aso Faraile na tea nei na toe taliu atu ai i Niu Sila le toatele o leoleo e silia i le iva sefulu sa malaga mai e fesoasoani i tiute o le puipuiga o le fono a malo laiti.
O nisi o loo faia nai malologa pupuu i aiga i Samoa ona toe malaga atu ai lea mo galuega aemaise o aiga ma fanau o loo faamuli mai.
