E tolu kalapu tapolo e patino tonu i o tatou tagatānuu, na faataunuuina le tauvaga i le malae i Fairfield i le Aso Gafua talu ai.
O kalapu nei e masani ona tauva i tausaga taitasi, o le Tautai Samoa, Sini Latasi ma le Sydney Eagles.
Na faavaeina le Tautai Samoa i le tausaga 1990, e le afioga Faamausili Taiva Ah Young, o ia foi sa faatautaia lenei kalapu i le tele o tausaga.
O le tausaga nei, o loo tulai mai le tofi Peresitene ia Lepua Evalu, ona ofisa lagolago, ae o le faatamā, le susuga i le faafeagaiga o Rev Alan Filipaina.
Alii kapeteni o Faleono Fuimaono, ma lona sui kapeteni o Tasi Lima. E luasefulu ma le ono sui o le Tautai Samoa.
O le Sini Latasi o loo faatautaia e Mulipola Fuivaa, ma ofisa lagolago, ae o loo kapeteniina e Lauano Tusiupu. Ua sefulu tausaga talu ona faavaeina.
O le Sydney Eagles o loo faafoeina e Fumatu Vaiola, ma ona ofisa lagolago. O le alii kapeteni o Auimatagi David Milford. Ua sefulu tausaga talu ona faavaeina lenei kalapu.
Mai kalapu nei taitasi, na filifilia ai o latou sui e ta‘i to‘a sefulu e tata i lea aso.
Peitai o le sikoa, poo ai e iloa ai le manumalo, e aumaia lea i sui e toavalu, ia na tata, o lona uiga e lē faaaogāina ai o sui taitoalua o ‘au taitasi.
Matagofie foi le tauvaga ona na fefiloi ai ma le itupa o tamaitai, auā e lelei lava le faatasi atu o nei tina e faamaopoopo taumafaiga a o latou alii, ia ma maua atu ai foi ma le faamalosi tino.
E lua itu na filifilia mai ai le manumalo o tamaitai, o le nett poo le faaaogāina o le handicap, lea na manumalo ai Ruta Tonumaipea.
O le cross poo le aunoa ma se handicap, na manumalo ai le tina faipisinisi o Eva Fuailemaa.
O le itupa o alii, i le vaega o le ‘au ta lelei, poo le A, o Lepetia Aiono. O le B, o Auimatagi David Milford. O le tausaga na tuanai, na aumau ai le talita i le Sini Latasi, ae o lea ua see mai i le 2011 i le kalapu a le Tautai Samoa.
Na faaiuina foi lenei tauvaga i se taumafataga tele, na maau i ai le Tautai Samoa, ma le lagolagosua a le Sini Latasi ma le Sydney Eagles, auā lava le sueina o le autapolo mo le siamupini poo le talita a le Tafatolu.
Malo le faamalolosi, e maua ai le soifua maua, auā e aogā foi faagatama e faamasani ai i o tatou tagata.
