Leva ona taulu‘ilu‘i le alii Amerika, ae lei tuumāmāina e le tama suluie lona oo mai
E ui i se taufaalili o le alii na malaga mamao mai i Amerika i le la fusuaga ma Alex Le‘apai ua lauiloa i le Lion Heart, o le siamupini foi a Ausetalia, peitai e lei tuumāmāina ai e le tama suluie lona oo mai.
Na amata le taaloga poo le tea laititi o le iva i le po o le Aso Toonai 4:12:2010, ina ua mae‘a lana tatalo i le Atua i le tulimanu o le maea fusu i le Convention Centre i Gold Coast.
O loo i luga o le Top 10 Alex Le‘apai i le fusi ole WBO, ma na maoluma le alii malaga mai Amerika ma lagona lona fefe ina ua vaaitino i le tagata e suafa ia Alex.
Na o le 8 taamilosaga na faatamoe ai si alii ae amata ona fai ifo lona malosi, e pei ona molimanao ai le alii malaga mai ua lava taamilosaga e 8.
Na tau iai se popolega o le aumaimoa ona o le tagata lenei o Darnell Wilson, o se tagata foi ua lauiloa ma ta‘uta‘ua i Amerika. Peitai na vaaia le to‘a o le susuga ia Alex Elise Le‘apai.
Na molimauina le matuā pasasa lelei lava o tu‘i mamafa mai lima lapopoa o Alex ma tauau ina a matapogia ai lana paga, e faapena foi i le alii o Darnell Wilson latou, na faigata ai lava ona iloa tino se tagata e manumalo i lea po.
Pe ā ma se 7 minute o faia le faaiuga a faamasino ae o le taimi lena ua na o le saō lava o le autapuai ma faalologo.
E lē gata o le mamalu o Samoa na auai ae faapea foi le au papalagi. Na logo i tino matagi lelei ina ua alaga mai, o Alex ua manumalo ma taufai pati ai le au maimoa.
Na lavea lona tapulima ona o le toatolu lea na auauai mai Amerika, o se alii muamua lea ua fusu ai agai i lalo Alex ona o le puupuu tele o lana paga.
Ae ui lava i lea, na fai sina faigata o le malaga mamao mai ae toe foi ma loimata.
O le taimi nei o loo faamaopo pea e Alex le fusi o le siamupini a Ausetalia, ua leai lava se isi na te toe fia lu‘iina ona o le fefefe i le Lion Heart.
O se tala fiafia lea o le a foi atu ma si ona tuaa ia Faatau‘i Le‘apai na malaga mai Samoa ona ua tini lau o lona faamoemoe. Na matagofie lea po i le lealea a tagavai e lua o Ausetalia ma Samoa i totonu o le maea fusu.
O le agaga faafetai ona o le lagolago mai a nisi o le atunuu e pei o le pule sili o le ABPS Lealaifola Lui ma Leigh ma le tele o i latou ua lē māua faapea uso ma tuafāfine o Alex, nai ona mātua ma le aiga atoa.
Faafetai Alex lou faaeaea aiga ma atunuu, sa lagona le agaga faafetai i le Atua ma le fiafia ina ua e momoli maia se tali faamalieloto i finagalo o le autapuai i lena po.
Manuia lava ou faiva Alex Elise Faatau‘i Le‘apai mo le lumanai.
