Ole ā se lagona ole tagata e atoatoa lona malosi pe a taia ini faaupuga mai se gagana e faauigalua ma foliga e taufaifai i lona tagata? E tasi lava le tali ole lē fiafia ma ulufia ona lagona ile maasiasi male faalumaina.
E faapena foi tagata e iai manaoga faapitoa e pei ona faamatala le tamaitai o Faaolo Masunu Utumapu ile aoaoga na taulamua ai le Nuanua ole Alofa le faalapotopotoga mo ē, e iai manaoga faapitoa.
“E tutusa lelei lava auā o matou foi a iai ni faaupuga mase gagana matou te faitau atu e faauigalua e lagona lava le vaivai ole loto”. Ole gagana faaaloalo a Samoa oloo faaaogāina tele ele autusitala male aufaasalalau e lipoti ai se tala e uiga ise taumafaiga ase tasi e iai manaoga faapitoa, peitai e iai taimi e faia ai ni tusitusiga pei oni tala mālie poo ni poka e tuusa‘o ai se gagana e faasino ise tagata e iai se manaoga faapitoa.
Tasi lea o ituaiga o tusitusiga poo ni tala foi e faia e tagata faasalalau i luga o leitio ma televise poo luga foi o fesootaiga televavave le social media e lē logo lelei ia i latou e iai manaoga faapitoa.
Ole aoaoga na taloina ele Nuanua ole Alofa sa valaau ai i itutino faasalalau eseese ile atunuu e auai mole fefaasoaa‘i o lagona ma manatu ise auala lelei e mafai ona lagolagoina ai le manaoga ole faalapotopotoga.
Ole mae‘a ole mafutaga na autasi ai e faataoto se taiala mo upu male gagana e faaaogā ini faasalalauga ma lipoti. Ose taunuuga ua faafiafiaina ai le Nuanua ole Alofa auā o lea ua maua ai se taimi muamua ole a silasila ai le asosi o tusitala ma tagata faasalalau i Samoa ise taiala e faaopoopo ile latou taiala ua taoto oloo lima taitaiina ai le latou galuega faasalalau.
“Ose tulaga tāua lea i lenei mafutaga auā o ai na iluilu talutalu ole a mafai ona tatou galulue faatasi”.
Ole finagalo lea ole faauluuluga ole ofisa ole Nuanua ole Alofa le afioga Mataafa Fuatino Utumapu ose uso ole tamaitai o Faaolo e iai uma o la manaoga faapitoa ona e po le vaai. Ose auso tamaitai ua iu mai aoaoga maualuluga i Iunivesite ma ua o la umia ni faailoga maualuluga.
Ose lagona faasoa o Mataafa na ia faailoa ai, e lē faapea a iai manaoga faapitoa ona vaai maualalo lea ole galuega faasalalau i lagona oi latou auā e ui ina iai manaoga faapitoa ae e mafai foi ei latou ona lagona aafiaga o tagata e atoatoa le malosi ole tino male mafaufau.
