O le faalapotopotoga lenei, o loo latou faatauina, faamaopopoina ma tuufaatasia le tele o taumafa eseese, ma tufatufaina pe momoli foi i maota ma aiga o tagata lautele, o loo moomia lea fesoasoani.
O se galuega e lē faigofie, ona o le taumafai malosi e saili seleni mo faatauga, ae o le tilivaina ma le faaooina i nofoaga ma aiga taitasi. A o le vaega sili ona maofa ai foi le loto, ona o le matutua o soifua o tamā ma tina o loo faia lea galuega, aemaise ai o ni galuega e ofoina i le agaga fesoasoani e aunoa ma se totogi.
Sa matuā telē se luitauina o le mafaufau ma le manatu, ina ua vaai ma faalogo, atoa ai ma le molimauina o le galuega tele a lenei faalapotopotoga. E taitonu le loto, o se galuega faamisiomare, o loo faatinoina i se isi auala ma se isi foi faiga, o loo faatino ai auā o le mea moni, e lē gata i le saunia ma le tilivaina o taumafa, a o se avanoa lelei ma le tāua foi lea o loo mafai ona fesootai ai ma tagata lautele, e faasoa ai le galuega faaletalalelei, mo le faakerisianoina o soo se tagata, auā o le finagalo moni lea o le Atua.
E faitau afe aiga o loo oo i ai lea fesoasoani i masina taitasi, i totonu o le aai i Aukilani atoa. O nisi o aiga e matuā leai lava ni taumafa, ona o le mativa ma le lē tagolima, aemaise lava o le utiuti ma le vaivai o tupe maua ua lē a‘ua‘u ai le faasoasoa i lea aso ma le aso. O le toatele foi o nisi o aiga, o tagata o loo sulufai mai i totonu o Niu Sila. E i le va o le 40 ma le 60 pasene o i latou, o aiga Pasefika, e aofia ai ma Samoa, e pei ona faamaonia e le susuga i le alii o loo faauluulu i ai lea misiona.
O le Christian Love Link, o se vaega o le tautua ma le auaunaga a le ekalesia Papatiso i Niu Sila, ma e pei ona ta‘ua, e lē o faapitoa le auaunaga faamisionare mo tagata lotu o le ekalesia, e leai o loo faasafua ma faalauteleina mo soo se tagata, ma soo se aiga o fia maua se fesoasoani i le tulaga i le tino, ma le agaga.
O le sini lava lea ma le autu, o lenei polokalame sa mafua ai ona faavae ma amataina, mai le tele o tausaga ua mavae. E pei lava ona ou taua muamua, ina ua faalogo ma maolimauina faamatalaga uma sa folasia, faatasi ai ma se feiloaiga ma le komiti faafoe, sa faamaonia lava i se lagona, o se galuega faamisionare lava lea galuega.
O nisi o galuega o loo ofoina e le Christian Love Link, e aofia ai le totōina o togalaau, ma le faamamāina o galuega laiti i totonu o le fale. O le kilivaina o taumafa ma lavalava, o le faitau tusi ma le tusitusi, o le fuafuaina tatau o seleni (budgeting), o le faatalanoaina ma le fofo o soo se faafitauli (counselling), faatasi ai ma le ofoina o se auaunaga mo femalagaiga i faatauga ma fomai poo le lotu (transport).
O le tausaga o le mafuie tele na aafia ai Kalaisetete, sa faapea foi ona oo i ai le galuega fesoasoani a le Christian Love Link, ma e silia ma le afe aiga sa faaoo i ai le fesoasoani a lea lava faalapotopotoga.
E ui ina ausage ma toagaogao, e ui foi ina ua matuā matutua lava, ma ua pulapula lagoto soifua o le toatele o tamā ma tina o loo faagaioia le galuega, peitai e matautia le alofa ma le agalelei o le Atua ia i latou. Ua o se mea fua, ma ua o se galuega faigofie mo i latou ona o le agaga talitonu ma le mautinoa i le latou galuega o loo faia.
E toatele tagata e leai ni galuega, leai foi ni fuafuaga o faia i aso taitasi, peitai, o loo sailia nisi e fesoasoani mo le tilivaina o taumafa, atoa ai ma nisi o galuega o loo lisiina i luga. E le gata i lea, a o ofoina foi taumafataga faaleagaga mo i latou o loo puapuagatia, ma fia maua se mapusaga.
O se fiafiaga sili, ona sa molimauina i lea lava aso, o loo filofilo ai nisi o tagata Samoa i lea galuega, ma na pau foi ia o tagata talavou o loo tuuina i ai o latou taimi e faasoa ma tilivaina taumafa i nofoaga ma aiga.
O le susuga i le faafeagaiga Pastor Tuilagi Meke Leilua, ma le susuga ia Charles Rivers ma lona faletua ia Vagana, o nisi ia o loo auai ma ofoina o latou taimi mo fuafuaga uma, ma o se sao tāua foi lea o tagata Samoa, e faitauina ai i totonu o le falapotopotoga.
Ae pei lava ona ta‘ua muamua, o se galuega e faia fua, e aunoa ma se totogi. O loo maua pea le avanoa, pe afai e fia ofoina lau fesoasoani mo galuega e pei ona ta‘ua i luga. Ia manatua, o lou lava taimi avanoa e lē faamalosia, peitai o se taimi itiiti e faaalu mo se galuega lelei e fesoasoani ai o loo faitauina ma faamauina, ma o loo e silafia lava le taui ma lona taunuuga.
O loo maua foi ni avanoa i le ofisa autu i Mt Roskill, i le taliina o telefoni ma faafeiloai manaoga o tagata o loo valaau ane. O taimi o loo manaomia se fesoasoani mo ia avanoa ma galuega, o le 9 i le taeao e oo i le 12 i le aoauli.
E toe faamanatu atu, o nei galuega uma e lē totogia ae ofoina mo lou lava taimi avanoa (volunteers).
E tāua tele foi ia galuega, mo i latou o faia ma sailia agavaa faaopoopo mo le sailia o se galuega poo work experience, peitai e avanoa lava mo soo se tasi. E mafai valaau ma talanoa i le telefoni 021 112 2242.
