Ua teena e loia ale faalapotopotoga o eleele o Samoa le mau tuu fofoga ale tamā o Nanai Liutofaga Tokuma o Sogi ona oni mau e faavae ini tala tuu fofoga poo tala faalogo, ole mafuaaga lea ole tolo ole faamasinoga ile fanua oloo finau ai le faalapotopotoga o eleele ale Malo ma le aiga ae se’i tapena le loia ale Itu tagi e tuuina atu mau e faamaonia ai le folasaga a Nanai Liutofaga.
O lea mau na faamatala ile faamasinoga na ta’ua ai e le tamā ole vaega eleele i Sogi ua iai le poloaiga ale Malo e tuua ma oese mai ai lo latou aiga, ose meatotino na foai atu mo le tamā o lona tamā o Turore Tokuma sa mau i Samoa ile vaitau o pulega a Siamani ma Niu Sila ma isi tagata Melenisia sa faigaluega i faatoaga ma pisinisi a ia pulega malo i vaitau o pulega faakolone i Samoa.
Ole faamatalaga a Nanai na faamatala atu e lona tuaa ua maliu e faapea, o Turore le tamā o lona tamā na tuua’ia sese ile solitulafono matuia ole faaoo ole maliu ise tasi, peitai ole toe maua mulimuli ane o tagata tonu na faia le solitulafono na tuua’iseseina ai le tamā o lona tamā, na faia ai le faaiuga ale Malo i lea vaitau e tuuina atu le fasi fanua i Sogi e avea ma taui ole tuua’ia sese o Turore Tokuma.
O mau e faamaonia ai lea faamatalaga a Nanai ile faamasinoga ole a faamaonia ai lana finauga oloo tauaveina e lana loia e teena ai le mau ale faalapotopotoga o eleele a Samoa ole fanua ose meatotino ale Malo.
O nisi o aiga sa nofoia fasi fanua i Sogi ua see atu ma faamautu i fanua umia saoloto ta’i kuata eka i Falelauniu, a’o nisi o aiga oloo mau pea i Sogi e aofia ai ma le aiga o Nanai Liutofaga Tokuma. Ole aso 9 o Mati ole a toe valaau ai lenei mataupu lea e tatau ona tuuina atu e le Itu tagi mau e faamaonia ai le latou finauga.
