E lē faatusalia mafatiaga na aafia ai aiga ole atunuu ona ole afa o Evani ile silia ile lima tausaga ua mavae, pe a fua i mafatiaga mai le afa o Gita ile po ole Aso Faraile ua tuanai. O tafega ma lologa ole pogai lea o aafiaga ua afea ai nisi o aiga ma pisinisi ilo tatou atunuu.
O Evani na matuā lofia vaega eseese o nuu e pei o Lelata, faasolo mai i Faatoia, o Matautu i Apia, alu ane ise vaega o Vaiala ma Moataa faapea le alu i totonu i pitonuu o Vini ma Levili. O lea foi ua toe mafatia nuu lava nei ona o tafega mai le vaitafe ole Vaisigano lea na osofia ai se vaega ole alatele i Lelata latalata ile alasima.
E lei tutū si’o o maa lapopoa ua tanu ai nei auvai ole Vaisigano amata mai ise vaega o Leonē ma alu i uta ile alasima i Lelata auā o ogalaau lapopoa e tele na aumai ele tafe na salalau ma taatitia solo i vaega eseese o ia nuu aemaise ole vaaiga mataina ole taatitia solo ile matafaga oneone uliuli oloo lumafale iai pisinisi ile taulaga o Apia.
Ole galuega oloo faagasolo ole fausia ole taligalu e taofia ai le oso ese ole vai pe a tatafe malosi ile vaitafe ole Vaisigano ua faaalia ele afioga ile Palemia oloo taofi e nisi o aiga oloo alala latalata i auvai ole Vaisigano.
“E tetee ona e mumusu e fau ia maualuluga le si’o sima. Pe ana lē faalavelave ae tuu le galuega e alu semanu e lē toe afea i tafega ma lologa ia na aumai e Gita”.
Ole faamatalaina lea ele Palemia ole tulaga ua mafua ai ona toe afaina meatotino e pei o fale o aiga oloo tetee. “Ua faaaogā ai le avanoa lenei e toe fautua atu ai ia i latou o tetee e tuu le galuega e alu ona silafia ai lea ole tāua o taumafaiga oloo faia nei ele Malo”.
I Savaii e tusia lenei lipoti e lei oo mai se faamatalaga ile komiti o galuega laveai i taimi o faalavelave faafuasei faanatura poo ā tonu ni mea na faaleagaina. E oo lava ile afioga ile Palemia ole taitaifono ole Komiti o galuega laveai e lei oo iai se lipoti.
Peitai o ata ma faamatalaga i luga o fesootaiga televavave faaonapo nei ua iloa ai e iai foi vaitafe ma alia e lē masani ona tatafe pe a timuga na faapena ona malolosi tafega ma aafia ai alatele ma nuu mai lologa.
A’o lei agi le afa o Gita sa muamua tatafe nisi o alia i Savaii lea na toetoe a faaletonu ai le pasi ale a’oga ole Don Bosco i Salelologa ile Aso Tofi ua mavae.
O faigamalaga a vaalele, ma vaa ole sami na taofia uma talu mai le Aso Faraile seia vaganā le Lady Naomi e lei oo sana malaga ile va o Apia ma Pago Pago ile Aso Lulu. O malaga ile va o Upolu ma Savaii e oo mai lava ile Aso Sa e leai ni malaga ona ole maualuluga o peau ole sami.
E tuuina atu lenei lipoti mo le faasalalauina ua toe tatala malaga a vaalele ae oloo taofia lava malaga a vaa la’upasese ile va o Mulifanua ma Salelologa faapea le va o Samoa ma Amerika Samoa. Ile aotelega o vaega na faaleagaina ile afā o Gita e tele lava i fa’i ma ‘ulu na toulu ile malolosi o matagi faapea nisi fale o aiga na su’eni apa.
Faaalia ele Palemia e tatau ona mae’a le lipoti atoa o mea na faaleagaina ile isi lua vaiaso o lumanai. Ole a maua ai foi ma le tau atoa. E faafetai ele Palemia lipoti muamua na oo atu mai le komiti e leai se soifua na afaina i sauaga ale afā o Gita.
