Malaga le au Tenisi a Samoa i Fiti mo le Fiji Open ma le Pacific Nations Cup

O le amataga o le vaiaso lenei na tuua ai e le au tenisi a Samoa le atunuu mo Fiti e tausinio ai i le taamilosaga tenisi a Fiti ua faaigoina o le Fiji Open e faia ai i Denarau i Nadi Fiti mai le aso 23 aga’i i le aso 27 o le masina lenei o Me 2018.

O le au tenisi a Samoa e aofia ai Steffi Carruthers, Eleanor Schuster lea o le a feiloa’i ai ma le au a Samoa  i Fiti, Leon Soonalole ma Vitikaras Taufao lea o le a tauva ai mo le vaega matutua i le itupa o alii faapea foi tamaita’i (Open Men’s and Ladies Senior Category).

O le isi vaega o le au tenisi a Samoa o loo filifilia mai i fanau talavou a le atunuu i le vaega o le development squad e aofia ai Crystal Christman, Penina Kamu, Mahina Tuala-Warren, Roselyn Tupuola, Gloria Meredith ma Darius Carruthers lea o le a tauva ai i le vaega mo i latou e i lalo ifo o le 14, 15 ma le 16 tausaga i le Junior Categories.

O le lima ai lenei o tausaga o tauva ai Samoa i le taamilosaga faavaomalo lenei a Fiti, le Fiji Open. O le tausaga na tea nei na taliu mai ai le au a Samoa ma pine auro e lima mai i lea tauvaga. Ma ua manatu ai le faalapotopotoga Tenisi a Samoa ina ia toe masii ai le au a Samoa i lenei tausaga.

O loo iai le faamoemoe e maea le Fiji Open i le aso 28 o Me ona toe taliu mai lea i Samoa o le au talavou poo le development squad ae faaauau ai le taamilosaga o le Pacific Nations Cup i Lautoka i Fiti mai i le aso 31 o Me seia oo atu i le aso 5 o Iuni 2018. O sui o Samoa o le a tauva ai i le Pacific Nations Cup e aofia ai  Steffi Carruthers, Eleanor Schuster, Penina Kamu, Leon Soonalole ma Vitikaras Taulafo faatasi ai ma Marvin Soonalole.

O le taamilosaga lenei o le Pacific Nations Cup o loo faamoemoe e tausinio uma ai au mai le Pasefika ina ia siitia maualuga ai o latou tulaga i le Rankings o le taaloga lenei o le Tenisi. O loo iai le faamoemoe o le Tenisi a Samoa e taua tele taamilosaga nei a le Pasefika ina ia tapena mamao iai alo ma fanau tenisi a le atunuu aua taaloga a le Pasefika lea e talimalo ai Samoa i le tausaga fou 2019.

O se tasi o ponesi mo le au tenisi a Samoa o le a malaga i Fiti, o le faamanuiaina ai lea o se tasi o tamaitai talavou a Samoa o Penina Kamu ise avanoa sikolasipi e aoga tenisi ai mo le umi e tolu masina i le aoga faapitoa mo le taaloga o le tenisi i Lautoka i Fiti (International Tennis Federation Training Centre).

O le a faatasi atu le tamaitai o Penina Kamu ise tasi o alo talavou o Samoa o loo aoga sikolasipi ai mo le tausaga atoa i Fiti o Elenor Schuster. O Elenor o loo faatupe ma lagolagoina e le vaega o le Totalisator Agency Board (T.A.B). O loo iai le talitonuga o le faalapotopotoga Tenisi a Samoa, o se auala lelei tele lea mo alo ma fanau a Samoa e aga’i atu ai i le itu faapolofesa o le taaloga tenisi i soo se vaega o le lalolagi.

Taua foi e le tamaitai taalo, ae o le faiaoga foi lea o le au a Samoa, ia Steffi Carruthers, e aoga foi le taamilosaga lenei i Fiti mo alo talavou a le atunuu lea o le a malaga ai mo le taimi muamua i totonu o Fiti, ma e lē o iai se manatu mamafa o le Tenisi a Samoa e maua mai ai se faaiuga lelei mai i le fanau laiti lenei ae o se itu e faamasani ai i latou i tauvaga tetele faapenei i le lumana’i.

Seia vagana ai le vaega matutua o loo iai le talitonuga o le Tenisi a Samoa e tatau ona maua mai ai ni pine auro mo Samoa e le gata i le Fiji Open ae faapea foi le Pacific Nations Cup.

Na faafetaia e le Faalapotopotoga Tenisi a Samoa le fesoasoani a le International Tennis Federation ma le Oceania Tennis Federation (O.T.F), Siva Afi Designs, o le Malo o Samoa e tauala mai i le Matagaluega o Aoga, Taaloga ma Aganuu e tusa ai ma le faatupeina o le au malaga lenei mo Fiti. Na saunoa faafetai foi le Peresetene o le Tenisi a Samoa ona o le avanoa ua tuuina mai e le Alii e mafai ona faataunuuina ai lea faamoemoe mo alo ma fanau tenisi a Samoa.