Aua ne‘i vaai maualalo se tasi i lou taulealea, a ia feoai faatasi ma lou Atua ma le loto maulalo. O nai vaiaso na tuanai atu na faapaia ai le ekalesia fou lenei i Jacana, ma ua molimauina le fiafia o tupulaga talavou e tapuai ma avea ma a latou ekalesia e tautua ai mo le Alii ma lona finagalo.
O se tasi o a latou manulauti na faataunuuina, o le polokalame mo tupulaga talavou e pei ona tatala ai mo soo se tasi aemaise o isi autalavou ina ia mafuta faatasi ma faamasani, o se tasi o anavatau tāua ma le aogā, e tau taofiofi ai tupulaga mai le gasolo atu i faalapotopotoga o loo faia amio matagā ma faatupu misa ma faalavelave i nofoaga faitele. O le naunautaiga lava o le Aufaigaluega ina ia tatalogo pea Masefau i loto o le tupulaga e ala i Afioga a le Atua, ae faapea foi aitema ma siva faitaga e pei ona fiafia tele i ai le tupulaga e faatino i faamoemoe faapenei. E lē gata e faaali ai a latou taleni, ae o le faaaogāina foi e osi taulaga atu ai i le Atua e faaopoopo i viiga ma pesega lotu faaneionapo.
O se tasi o aogā tāua o faamoemoe nei, e fausiaina ai tupulaga ina ia lototetele ma galulue faatasi, taumafai e tuu ese le faamisa ma le fevaevaea‘i, auā a moni le alofa i le Atua ua moni foi le alofa i ou tuaoi ma ou uso a tagata. O se tasi lenei o faafitauli o loo maitauina pea le faatuputupulaia ma saoasaoa le ofi atu i ai o alo ma fanau a Samoa o loo ola i le aai o Melepone, ae ave pea le agaga faafetai i ekalesia eseese ma le vasega o faafeagaiga, tainane tupu ma tamalii, o loo lagolagoina polokalame faapenei, auā o loo feasoasoani malosi pea mo nai fanau fai a‘e, ia ma le isi foi itu, o i latou o taitai o Samoa i le lumanai, e lē gata i nuu ma afioaga, a o ekalesia ma le malo.
Tatou tutu pea i matagiolo mo tupulaga.
