E pei ona logologoa tala ole mafuie 7.5 le malosi lea na lulu ma lia‘i ile vaveao ole Aso Gafua ole vaiaso na tea nei i Kaikoura, ma Ueligitone ma le aai o Kalaiesetete, e faapena ona logologoa le faalogo atu ile tele o fale faigaluega, pisinisi, aoga ma faleoloa na tapunia. O vaalele ua lē mafai ona feoai ma taofia ai malaga ale toatele o tagata.
O totonu ole Laumua e pei ona silasila ane i ata ole televise e pei ose mafuie pito i sili lea ona umi ona lulu talu mai le tele o tausaga ua mavae. Ae ole mea e sili ai ona faafetai ona na lulu le mafuie ile taimi oloo malolo le toatele o tagata, auā ana lia‘i ile taimi o feoai i galuega, ole mea moni e toatele le ‘aumaliliu, ae lē toalua e pei ona faalauiloa mai e televise.
Sa taufai faasalalau i luga o ala faatekonolosi le tapunia o aoga ma galuega e tele ile Laumua ma taulaga i Kaikoura ma Kalaiesetete. E tolu lava aso o tapunia faleaoga ma isi faleoloa ma galuega talu ai le tele o isi luluga laiti mai pea ole mafuie ina ua uma le vaveao ole Aso Gafua.
Tele lipoti eseese na faalogoina i luga o leitio ile Laumua i molimau eseese a tagata na latou faalogoina lea mala faanatura. O isi na latou taufai vivii ile Atua ina ua leai se maliu ose tasi osi o tatou atunuu. O isi foi na faasoa mai; atonu o lea ua lata le Aso ole Alii.
Ia tailo pe moni lea faaaliga, ae ole mātau atu i lenei mala faanatura a isi fai mai, e asiasi mai le Atua i ona tagata poo latou manatua o Ia. Ose faaaliga ole matautia ole mamana o galuega ale Silisili ese e toe faamanatu mai ai ile lalolagi, oloo soifua pea o Ia e ao ona tatou viia ma faatuatua iai. Ole faalogo atu lea ile tele o finagalo faaalia i luga o leitio.
Ile faalogo atu ile Palemia o John Key e faitau piliona ma piliona tala le tupe e ao ona toe faaleleia ai fale ma taulaga ua faaleagaina. O auala ua mavaevae faapea ma ala o nofoafi ua matuā momotu lava ele mafuie.
Talofa ile faalogo atu ile po lea i leo o nai tamaiti ua fetagisi mai i tuaoi ina ua lulu le mafuie. O isi na fafagu tagata i luga ina ua lulu le mafuie ma taumafai e tutū i lalo o faitotoa o potumoe.
Manatua e matuā leai lava se aogā o lapataiga ia e fai mai e taoto i lalo ma ufiufi le ulu, pe a toulu iai kapoti mamafa ma pusatu, aemaise foi pe a pa‘ū ifo le taualuga ole fale tanumia uma ai.
Ia ae e oo mai lava ile taimi nei oloo iai lava le popolega i isi tagata pe a lulu mai nei aftershocks ia e faalogoina pea.
E lē iloa poo afea e mae‘a ai ona teu auala ma toe faalelei fale tetele ole taulaga ma faleaoga ua afaina. Ae ia tatou onosai pea ma tatalo e iai lava le agalelei ole Atua i lana fanau faatuatua.
