Ua mavae atu lena tausaga ua tuanai atu ma ona galuega ma tautua, o lea ua tele ina toe amataina galuega tautua mo le saili malo ai o nai o tatou tagata.
Ua faamautu foi Laulau a fono a faalapotopotoga ma soo se ekalesia auā le solosolo lelei o le agai i luma. I le Fono Faufautua mo tagata Samoa i le aai o Melepone, ua mae‘a tofia foi la latou Laulau a fono fou e faatautaia tiute tauave auā le paia lasilasi o nai o tatou tagata o nopiai i le aai tele mo lenei tausaga fou.
Ua tasi nei le finagalo o le fono mamalu ma filifilia ai le fetalaiga ia Sa‘u Autaloto Brown e avea ma taitaifono, ae sui taitaifono ua seei ai nei le afioga a Lemalu Nofoituala Faatau. Ua tofia le fetalaiga ia Taugaoleula Lio Luafalealo e fai ma aao tusitusi o le fono ae lagolagosua i ai Karolina Salanoa.
Ae ua autasi finagalo e teuoloa le tausi ia Margret Luafalealo ma lona sui o le faletua ia Su‘a Aliitasi Faatau. Na saunoa faafetai le aufaigaluega paia ma faaee atu o latou aao e faamanuia i le laulau fou mo o latou tiute fai o le a feagai ai.
E lē taumate o le faamanuia foi lea a le atunuu atoa, ina ia to mai le lagi finagalo e faatautai ai le sailiga malo a le fono faufautua mo lenei tausaga. O outou māmā na, manuia la tou tautua mo Samoa.
