O le vaiaso lenei le uluai vaiaso o le taumafaiga tele lea ua faalauiloa e le Matagaluega o Leoleo i Samoa mo le atunuu e lei lesitalaina a latou laau malosi ina ia faafoi ane laau malosi ia mo le lesitala ma le laiseneina.
O se avanoa o le a lē faasala pe molia ai i latou i totonu o Samoa o loo iai laau malosi, ae e lei agai lava e lesitala pe laisene foi mo lenei tausaga.
O le masina lenei o Novema ma le masina o Tesema lea ua tuu atu i ai le avanoa lenei ua faamalosia e le Ofisa o Leoleo ma le faamoemoe o le a toatele le atunuu e agai atu i le ofisa i Apia e faia lea tulaga.
Faaalia e le Sui Sooupu o le Matagaluega ia Su‘a Muliaga Tiumalu, ua tele osofaiga ua faia e leoleo ua matauina ai le tele o laau malosi ua maua faatasi mai ma fualaau faasāina e lē o lesitalaina pe iai foi ni laisene ma o se popolega tele lea i le tele o nei aupega o loo i totonu o le atunuu ae e lē faatulafonoina foi le umia e le atunuu.
E lē gata foi i lea ua maua ai ma le tele o fana e lē faatagaina le vaaia i Samoa. O fana laiti e lē faatagaina ua na o fana tetele lava e pei o le pulu tasi atoa ai le ituaiga o le 13. Ae ua tele foi isi laau malosi ua maua i vaega eseese o le atunuu ma e masalomia lava foi auala eseese ua mafai ona maua ai i Samoa.
O lea foi e lei mamao atu nei le maliu o se tamatiiti na fana lava e sana uo ae o le laau malosi na maua i lalo o le moega e tamaiti ma taaalo ai.
O lea foi la ua toe lapatai mai le Matagaluega mo le atunuu e aua ne‘i faatamala i le lesitala lea o laau malosi ona o faalavelave e tulai mai ai ma le saogalemu o le atunuu ma lo latou soifua.
O le vaitau o le 2009 na gata mai ai se gun amnesty poo se avanoa faapenei ua mafai ai ona agai atu le atunuu ma a latou laau malosi i le matagaluega o leoleo. Faaalia e Su‘a o soo se tasi lava e agai atu ma laau malosi nei mo le lesitalaina pe o le avane foi i le ofisa o leoleo e saili pe ua iai se laisene o le a lē afaina i le tulafono pe a faatino lenei gaioiga i totonu o masina e lua ia ua faamamalu ai lenei avanoa e le Matagaluega o Leoleo.
