E ui ina momoe mai tiasā nisi o tuaa sa asaina le gasū ole taeao ma amataina lenei lotu faamanatu, peitai, o taimi sili nei ona tulimatai iai le toatele o lenei aiga, ole lotu faamanatu e feiloai fiafia ai tagata uma.
Ole Aso Toonai muamua o Ianuari i tausaga taitasi, ole taimi lea e faataunuuina ai le lotu masani ale Aiga ole Au-Salamo i Perisipeni i Ausetalia.
O lenei lotu ua 116 tausaga talu ona faavae mai ile Afioaga i Faleasiu ile maota o Filia, peitai, o lea ua tupu ma ola le aiga ma ua faamanatu pea i atunuu i fafo. Oloo faataunuuina foi i Aukilani ma Ueligitone i Niu Sila i tausaga uma le lotu faamanatu lenei ale aiga.
I totonu o Perisipeni lava ia, ole tausaga e 2006 na faia ai le lotu faamanatu muamua, ma ua atoa ai nei le 12 tausaga o faia pea le lotu faamanatu ale aiga i totonu o Ausetalia.
Ile Aso Toonai na tea nei, aso 6 Ianuari 2018 ile 10am ile taeao, sa faataunuuina ai lenei faamoemoe e ala lea ile sauniga lotu ile malumalu EFKS Westside. Ole nofoaga oloo susū ai le Susuga ile toeaina ia Rev. Elder Lance Tautiepa ma lona faletua ia Satelite Tautiepa, ole faifeau Toeaina ole Pulega a Sisifo.
Sa faaalia ele susuga ile faafeagaiga ia Rev Petaia Tuifao se lagona meemee ma le agaga faafetai ona ua maua ai se mafutaga ma le Susuga ile tamā pule ole Kolisi Faafaifeau i Malua, le Susuga ia Rev. Maafala Lima ma lona faletua ia Lalokava Lima, sa ia taitaia le sauniga lotu ale Aiga. O ē sa mautofi i lenei sauniga, ole alii talavou o Michael Aemalo Ropati sa ia faitauina le Tusi Paia ile Feagaiga Tuai.
Ole tamaitai talavou o Moana Luapene Nepo, sa ia faitauina le Tusi Paia ile Feagaiga Fou. Ole faletua ole faafeagaiga ia Matautu Ieriko Sopoaga sa ia tatalo ile Faafetai, ae ole faletua ole Aoao Fesoasoani ia Taaloloomalo Anae Leleiga Anae sa ia tatalo ile Faatoesega. O Muagututia Salā Sautia sa ia tatalo e molimolia Manaoga.
O viiga logo mālie ma pese ole sauniga lotu sa saunia lava ele Aiga ole Au-Salamo. Ole ta piano ole Susuga ile Aoao Malua ua sauni atu mo lona tausaga muamua ole susuga lea ia Faafetai Mani Nepo ae ole fuataimi ole Susuga ia Rev. Petaia Tuifao ole tasi lea o lupe faalele ale Aiga oloo galulue ma le faletua ia Sarai Tuifao ile EFKS Southside, ole failautusi foi ole Pulega a Sisifo.
Na tea muamua lava mea i Matautu Sa e ala ile sauniga lotu ona alo lea ole aiga mo le taumafataga tele, auā le taligasua ole aoauli. E lei tuumāmāina le agaga fiafia ma le aao mafola e ala i faaaloaloga masani auā le susuga ile alii pule ole Kolisi faafaifeau mai Malua ma lona faletua.
Na taualuga fuafuaga uma i lana fonotaga masani ai, aua foi nisi o mataupu tauave ole Aiga aemaise nisi o mea e fia faaleleia ole lotu mo le tausaga fou 2019.
Ose mafutaga e faatumulia ile agaga fiafia ma le loto faafetai ile Atua. Ole faamoemoe maualuga o lenei lotu faaleaiga, “Ia iloa ele Aiga ole Au-Salamo ona manatua le alofa ole Atua, ona o faamanuiaga ua faamanuiaina ai le aiga, aemaise lava ile itu ole tala’iina ole Talalelei ale Atua.
Ia aua ne’i motu le gafa ole aiga auā ana tamafanau mo le tala’iina o lona finagalo, faapea taleni ole musika oloo faatalenia ai le tele o fanau ale aiga ua salalau ile lalolagi, faapea taleni ma agavaa eseese ua faamanuiaina ai le aiga.
E talosia foi matai ole aiga ina ia maua le tofa faale-Atua e tausia ai ma le faamaoni le aiga. O nei tamaoaiga o mafaufauga, e lē mai se isi lava mea, na ala uma mai nei faamanuiaga mai le Atua.
“O lagona ma faanaunauga e molia pea i talosaga a lupe faaalele ma le aiga, na manatua ai tuaa ua faiilagi folauga, ina ia faaauau e augatupulaga ma latou tauaveina pea le agaga ole LOTO FAAFETAI ILE ATUA ONA O ANA MEAALOFA MA FAAMANUIAGA I TOTONU OLE AIGA ae le gata i lea ia faapea ona aoao mai pea e lona Agaga, ia faavaeina le Aiga i Ona ala uma. A mae’a se galuega e foi pea le viiga ile Atua!”
E avea ai le tautua ale Samoa Times e faamanuia atu ai le tausaga fou ile Aiga atoa i Samoa ma Niu Sila ma le lalolagi atoa ma Perisipeni nei faatasi ma alofaaga mai le laulauafono: Taitaifono Anae Nanai Tino Sio; Failautusi Aemalo Nikolao Ropati; Teutupe Liliuese Anae Maa Anae.
